Way paborpabor

Pormal nang nanumpa sa katungdanan ang 37 ka bag-ong bombero dinhi sa Rehiyon 7 niadtong Nobiyembre 12, 2012. Usa ka yanong programa ang gihimo sa rehiyonal nga buhatan sa BFP 7 nga gipangulohan sa among Regional Director SR. SUPT. MA. LUISA C. HADJULA, MM. Sa iyang mensahe, gipaabot ni Sr. Supt. Hadjula iyang dakong kalipay nga nadugangan na usab ang pwersa sa atong nagkuwang nga personnel sa BFP 7 ug iyang gihagit ang tanan nga magtinarong sa pagpanerbisyo aron dili mosangpot sa mga problema sa umaabot.

Ang maong 37 ka buok nga nadawat miagi gyud sa makuting proseso sa maong recruitment. Dili sayon ang proseso nga naagian sa maong mga aplikante. Gikan sa 200 nagkaanam kini ka gamay sanglit ang mga dili kwalipikado o ba kaha nahagbong sa mga eksaminasyon sama sa neuro-psychiatric test, physical ug sa medical.

Importante gyud nga pasado sila sa maong mga examinations aron masiguro nga fit sila both physical and psychological nga mamahimong miyembro sa BFP. Ang tanang recruitment o hiring ma pribado man kini o sa gobyerno maka expect gayud kita nga daghan ang mo apply niini sanglit lisod man kaayo ang panrabaho karong panahona.

Apan angayan natong ikonsiderar nga dili tanang mo-apply madawat gyud. Duna man gyu'y proseso sa recruitment ug mga qualifications nga angay sundon ug maoy rason nga dunay dili madawat ug limitado ra gayud ang slot maong dili ma accommodate ang tanan.

Nahisgotan nako kini gumikan sa akong nabasa sa Banat News nga migawas niadtong Nobyembre15, 2012 diin ang banner story nagkanayon nga "Eksamin sa bombero dunay pabor pabor"? Alang sa kasayoran sa publiko,miagi gyud sa makuting proseso ang maong recruitment sa bag-ong bombero. Gani ang mga test questionnaire nagikan sa BFP National Headquarters ug selyado pa kini sa wala pa sugdi ang eksaminasyon. Angayang mahibaw-an sa tanan nga gawas sa mga opisyales sa BFP nga milangkob sa Recruitment Board, duna usab representante sa DILG ug dunay usa ka Pari.

Sa isyu bahin sa paghatag og pabor sa mga anak ug paryente sa atong kabomberohan sa maong hiring, angayang mahibaw-an sa publiko nga daghang mga anak ug paryente sa atong kabomberohan nga wala madawat. Dili man pud siguro maayo nga did-an nato ang mga anak sa atong kabomberohan nga makasulod sa BFP ug mamahimo usab nga bombero sama sa ilang amahan o ba kaha inahan.

Nakasiguro ko nga sama sa laing mga ahensiya sa gobyerno dunay mga anak pod nila nga ilang gipasulod sa ahensya nga ilang gisilbihan ug wala man kini gidili sa balaod. Tinuod dunay mga anak sa atong kabomberohan ang nakalusot sa maong recruitment apan makasiguro ko nga miagi sila sa tanang makuting proseso ug walay pabor pabor nga nahitabo.

Mas maayo siguro nga magmalipayon na lang ang tanan hilabi na ang publiko kay nadugangan na ang pwersa sa atong kabomberohan ug nakasiguro ko nga kining 37 ka bag-ong bombero andam kini silang moserbisyo sa publiko.

* * *

Sa pikas bahin, dunay bati na pud nga balita akong ipaambit ninyo sanglit sa miaging Nobyembre 11, 2012 dunay surprise ug random drug test sa mga sakop sa atong kabomberohan lukop rehiyon 7 nga gipasiugdahan sa among Regional Director.

Sa dul-an 30 ka personnel nga gipatawag alang sa maong drug test,10 ka buok ang mipositibo niini. Grabe na gyud ang negatibong epekto niining ilegal nga drugas kay hasta ang mga kawani sa gobyerno nahimo nang biktima niini.

Apan ang maong resulta ipadala pa sa kaulohan aron makompirmar kun ilegal ba gyud nga drugas ang nakapahimong positibo nila sa maong random drug test. Ang nakaparat ra ba kay basi sa Civil Service Circular 2003-10, ang masakpan nga empleyado sa gobyerno nga nagamit og illegal nga drugas mapahamtangan og dismissal from service bisan pa og kini first offense pa lamang.

Hinuon hatagan pa gihapon ang maong kawani sa iyang katungod sa pagdepensa sa iyang kaugalingon pinaagi sa paghatag og due process. Dili diha diha dayon taktakon kun ang pagka positibo makonpirmar na ngadto sa kaulohan.

Sa kataposan, akong ipaabot akong mga pahasubo sa pamilya sa atong idolo sa radyo ug sa print media nga si Marlon Bellita nga mitaliwan na sa laing kalibotan. May his soul rest in peace.