Unang hilisgutan

Nahimo siyang kura paroko sa Parokya ni Santa Teresa sa Avila sa Talisay Sugbo niadtong 1943. Nangalagad siya niini sulod sa napulog-duha ka malambuon ug mabungahong mga katuigan. Sa tuig 1955 natudlo siya nga Obispo Auksilyar sa Jaro, Iloilo. Giordenahan sa Pagka-Obispo sa iyang Arsobispo Julio Rosales sa Sugbo uban nila ni Manuel Mascarinas, Obispo sa Tagbilaran, Obispo Manuel Yap sa Bacolod ug Obispo Jose Ma. Cuenca ang Arsobispo sa Jaro, Iloilo nga maoy mihatag usab sa wali niadtong May 29, 1955 Domingo sa Pentekostes. Ug pagka-Mayo 31, 1955, nagsugod siyang Obispo Auksilyar sa Jaro, Iloilo. Natudlo siyang Obispo Auksilyar ni Arsobispo James Haes, SJ niadtong Hunyo 10, 1958 sa Artsidiyosesis sa Cagayan de Oro. Nahimo siyang kura paroko sa Parokya ni Santa Rita sa Balingasag, Misamis Oriental niadtong tuig 1959. Gitukod niya ang mga kongregasyon sa Blessed Virgin Missionaries of Carmel ingon man ang Carmelite Tertiaries of the Blessed Eucharist ang mag-uuna sa Daughters of Saint Theresa (DST).

Ni-retiro siya sa pagka-Obispo Auksilyar sa Artsidiyosesis sa Cagayan de Oro niadtong Hunyo 17, 1970 gumikan sa  iyang nagkaluya nga panglawas. Nibalik siya sa Sugbo ug nahimong Obispo Auksilyar ni Julio Cardinal Rosales. Gidestino siya ingon nga kura paroko sa El Pardo niadtong Oktubre 1, 1970 ug pagka-1976 nahimo siyang padre kura sa iyang kaugalingong lungsod sa Carcar, Sugbo. Sa tuig 1985, nakabaton og Diocesan Right ang Daughters of St. Theresa (Avila) ang kongregasyon nga natukod ni Obispo Teofilo. Ug niadtong Septiyembre 27, 1988 human sa paniudto sa Seminario Mayor de San Carlos kay kapistahan man ni San Vicente de Paul namatay  si Obispo Teofilo Bastida Camomot sa usa ka disgrasya sa kadalanan sa may alas dos ang takna sa hapon.