Empleyado nga mi-resign na makadawat ba gihapon og 13th month pay

 Ang 13th month pay, usa ka balaod busa dili gyud makalikay niini ang mga kompaniya nga mohatag sa ilang mga empleyado. Mga rank and file employees, mga employees paid by results, those with multiple employers, private school teachers ug uban pang empleyado apil sa makadawat og 13th month pay basi sa Revised Guidelines of the Implementation of the 13th month law. Apan ang pangutana kun ang empleyado nga mi-resign na, makadawat ba usab siya sa 13th month pay? Kana nga pangutana ang atong tubagon karon.

* * *

Dear Atty. Divine,

Nabasa nako ang imong column sa Banat News hinungdan nga misuway ko sa pag-email kanimo. Nag-resign ko sa akong trabaho niadtong October 30, 2012 ug niadtong November 5 gibayran ko sa akong Company sa last payment sa akong suweldo. Nagtuo ko nga apil sa ihatag sa maong Company ang 13th month pay apan wa man giapil og hatag Attorney, mao nga naglibog ko ug ang akong pangutana kun dili ba diay ko entitled sa 13th month pay? Ang ubang company manghatag man og pabawon sa ilang empleyado nga mo-resign apan ang akong company wa may gihatag, dili ba diay sab mandatory nang paghatag og separation pay? Hinaut imong matubag ang akong pangutana. —Gina

* * *

Dear Gina,

Kanang 13th month pay kon Presidential Decree 851, mandatory kana nga ihatag sa atong mga employer ug ang balaod nagmando nga kinahanglan kini ihatag sa empleyado on or before December 24 sa maong tuig. Basi sa revised guidelines sa pagpatuman sa maong balaod, kadtong mi-resign na nga empleyado mamahimo gihapon nga modawat niini in proportion sa length of time sa iyang gitrabahoan sa maong tuig. Sa ato pa kun nagtrabaho ka gikan sa Enero hangtod sa Oktubre kuwentahon na sa kompaniya kun pila ang angay’ng ihatag nga 13th month pay kanimo ug ang maong bayad imo dapat madawat sa dihang ikaw mibiya na sa maong kompaniya ug mamahimo ka nga mo-demand niini sa imong gitrabahoan. Samtang sa lain nimong pangutana kun obligado ba ang kompaniya mohatag kanimo og separation pay, ang tubag niini dili, tungod kay boluntaryo man ang imong pagbiya. Hinuon adunay ubang company nga mohatag og pabawon sa ilang empleyado bisan kun kini boluntaryo nga mi-resign apan dili kana mandatory.

Hinaut nga nahatagan og katin-awan  ang imong mga pangutana. — Atty. Divine

Kun aduna moy pangutana ipadala lang sa  Legal Corner sa Banat News or email sa [email protected]