Pagbudhi
Sugod sunod buwan ipatuman na ang bag-ong minimum wage sa Central Visayas kini human nauyonan sa Regional Tripartite Wages and Productivity Board kon RTWPB ang P22 nga umento.
Gikan sa P305 mamahimo na kini nga P327 sugod karong Disyembre 10. Ang usbaw nahimong posible tungod sa paningkamot sa mga labor representatives sa wage board nga sila si retired judge Ernesto Carreon sa ALU-TUCP ug Jose Tumongha sa APL. Bisan ubos ra sa gidemanda nga P90 sa ALU ug P121 sa APL apan dako na kaayo kini og mahimo alang sa mga anak sa singot. Salamat nilang Judge Carreon ug Mr. Tumongha nga wala mapiog sa panagkonsabo sa management ug government representatives aron pugngan ang gipangayo nga usbaw sa suholan. Sayod ang tanan unsa kalisod ang giagian nga lantugi usa nakab-ot ang umento. Nagsugod ang lalis niadto pa dihang ilang gihukman duna bay supervening condition aron ilang matuki ang wage petition bisan wala pay tuig sukad giisyu ang labing awahi nga wage order.
Nag-aginod ang proseso tungod kay kanunay nga dihado ang labor tungod kay naandan na ang kumbuya sa management ug government sector pagbabag sa iduso sa labor. Bisan gani nauyonan na ang kantidad sa umento misuway pa gyud og hirit si DTI regional director Asteria Caberte. Buot niya nga dili ipatuman sa tibuok rehiyon ang P22 nga usbaw sanglit matud niya angayang mas barato ang ubang probinsiya kay sa Sugbo. Ang nakaanomaloso sa iyang gihimo tungod kay niuyon na ang mga representante sa management apan siya gyud maoy nag-una-una og duso nga lahi-on ang usbaw sa ubang probinsiya.
Pila bay gidawat ni Caberte gikan sa mga negosyante nganong ingon niini ang iyang pagproteher nila? Nganong mas nabalaka siya sa mga tag-iya sa puhonan nga dili mapasmo og mobayad og dugang P22 nga suholan kay sa dugay na nangapasmo nga mga obrero tungod kay dili paigo ang ilang income. Kun mas loyal si Caberte ngadto sa mga negosyante nganong dili naman lang siya moluwat sa gobiyerno ug mobalhin sa private sector aron adto moserbisyo sa duol sa iyang dughan. Angayang pahinumduman si Caberte nga isip opisyal sa gobiyerno iyang obligasyon ang pagpanalipod sa interest sa kinabag-an ug dili kay ang interest sa mga adunahang negosyante. Ang paghimo niini usa ka matang sa pagbudhi sa katawhan nga maoy tinuod nga hinungdan ug diwa sa gobiyerno.
* * *
Si Bise Gobernador Agnes Magpale giingong nanghatag og mga leaflets nga gitumong pagdaot sa ilang kaatbang nga partido ang One Cebu Party. Si Kongresista Pablo John Garcia mireklamo nga foul ang gihimo sa ilang kaatbang tungod kay usa kini ka matang sa black propaganda. Ang unod man gud sa leaflets nagkanayon nga batuka ang lingla, lipat-lipat ug ilad kon Balili. Klaro nga ang buot nilang mensahe nga ipadangat sa katawhan mao ang kontrobersiyal nga Balili transaction sa Kapitolyo didto sa dakbayan sa Naga.
Pastilan, wala uroy lipaki si Magpale niini. Alang nako isip sakop sa hunta probinsiyal nga maoy nihatag og pagtugot ni Gobernador Gwen Garcia pagpalit sa kontrobersyal nga lote didto sa Tina-an dili siya kapanghunaw niini. Gani kun buot huna-hunaon mas dako sila og sala tungod kay didto magsugod nila ang transaksiyon. Kun wala nila hatagi og katungod ang gobernador nga mopalit sa luna way Balili transaction nga nahitabo. Mas dali sab tuohan nga silang mga sakop sa board maoy nagkonsabo tungod kay ilang kauban nga si Juan Bolo maoy promotor niini. Busa kun akoy Magpale mas maayong iyang hunongon ang paggamit og black propaganda. Mas makatabang niya kun iyang himuon ang pagtug-an sa katawhan unsay iyang mga nahimo isip sakop sa board.
* * *
- Latest
