BIR hadlok og tycoon?

Husto ang akong pangagpas nga si US Pres. Barack Obama (Democrat) mao gihapon ang mangulin sa White House sa mosunod nga upat ka tuig. Kini maoy katapusan niya sa walo ka tuig nga termino sa presidente sa US sigun sa ilang batakang balaud.

Nakuha niya ang 303 ka college electoral votes batok sa kang Republican candidate Mitt Romney nga 206 lamang. Ang makakuha og labing minus 270 sa 538 college electoral votes mao ang modaug sa US presidential election. Apil sa napildi mao ang laing mga kandidato pagka-presidente nga sila si Gary Johnson (Libertarian Party), Jill Stein (Green) ug Virgil Goode (Constitutionalist Party).

Gituhuan nga ang bagyong Sandy, nga nagpakita sa tanang mga Amerikano sa abilidad ni Obama sa pagresponde sa kalamidad nga mao usay nakakombinsir kang independent New York Mayor Michael Bloomberg ug New Jersey Gov. Chris Christie (Republican) sa pag-endorso kaniya- maoy usa sa nakatampo sa iyang kadaugan.

Akong gipaabut nga status quo ang palisiya sa US gawas sa pipila ka gagmay'ng kausaban.

* * *

Si Kong. Emmi de Jesus (Party-list, Gabriela) mipasaka og resolusyon (House Resolution 2793) alang sa usa ka congressional inquiry kun giunsa sa Bureau of Internal Revenue (BIR) ang pagkolekta sa buhis sa mga dagkung korporasyon ug mga tawo nga napasakaan nag kaso tungod sa kadudahang pagbayad sa ilang buhis.

Buot ni Kong. De Jesus nga ang House Committee on Good Government modapit kang BIR Commissioner Kim Henares aron pag-update sa komitiba kalabut sa 79 ka mga tax evasion cases nga naduso sa Department of Justice (DOJ) sukad niadtong 2010 ubos sa Run Against Tax Evaders (RATE) Program sa BIR.

Karong bag-o, napasakaan na sa BIR og kaso ang natangtang nga supreme court chief justice Renato Corona ug iyang pamilya. Misaad si Henares nga tininuod gayud ug walay pagpinig kining ilang kampanya batok sa tax evasion. Apan si Kong. De Jesus mitumbok sa kaso nga gipasaka ni Danilo Pacana, kanhi regional audit manager sa Allied Bank, batok sa maong banko niadtong 1987, panahon sa administrasyon ni Pres. Corazon Aquino.

Ang P213-million tax evasion case batok sa Allied Bank gi-dismiss ni kanhi BIR Commissioner Rualo. Sumala sa kongresista nga kwestiyonable ang dismissal sa maong kaso.

Niadtong December 6, 2011, laing kaso ang gipasaka ni Pacana, niining higayona batok sa Philip Morris Fortune Tobacco Corp. (PMFTC) ug sa Asia Brewery Inc. (ABI). Ang BIR, sumala kang De Jesus, gihatagan og detalye kun giunsa niining maong mga kompaniya pagpaagi aron dili sila makabayad sa hustong buhis nga gibanabanang mokabat og P1.2-trillion apil na ang mga penalties ug interest charges batok sa PMFTC lamang.

Si Henares mipahibawo kang Pacana niadtong katapusang semana sa Desiyembre 2011 nga ang BIR nagsugod na sa pag-imbestigar sa PMFTC ug ABI. Niadtong Hunyo 1, 2011, si De Jesus mipahibawo nga ang DOJ miindosar usab ngadto sa BIR sa pag-imbestigar sa Fortune Tobacco Corporation, Asia Brewery ug Tanduay Distillers Incorporated tungod sa pagduda nga wala kini mobayad og hustong buhis.

Ambut kun unsa na kaha ang resulta niining maong mga imbestigasyon nga gihimo sa BIR. Dili kita makapugong sa pagduda sa katawhan tungod kay multi-bilyonaryo man gud ang tag-iya niining maong mga kompaniya ug daghan usab kini’g koneksiyon nga mga inilang politiko.

Dili ko motoo nga si BIR Commissioner Henares mahadlok sa mga tycoon. Nagmatngon lang tingali siya nga dili makatunob og tiil sa mga higala sa iyang amo.

* * *

Sa politika sa Sugbo, morag wa may lihok ang mga kandidato sa Liberal Party (LP) sa probinsiya. Samtang kugihan kaayong nangampanya si Kong. PJ Garcia sa One Cebu ug nanabud og salapi ang iyang igsoon si Gob. Gwen Garcia, nga modagan pagka-kongresista sa tirsiro distrito, ang kandidato sa pagka-gobernador sa LP nga si Atty. Junjun Davide ug bise gobernador Agnes Magpale mora man og naghuwat og milagro.

Kun nagtoo sila nga ang indorso lamang ni Pres. Noynoy Aquino mao ray bugtong makapadaug kanila maayo pa og maglana sila’g putot sa lubi. Nahadlok ako nga kun magpadayon kining pagtinapulan sa mga kandidato sa LP ilubong sila sa mga kandidato sa One Cebu.

Bisan kun walay kwarta nga gihatag ang LP kinahanglang mosuroy ug makigkita unta sila sa ilang mga lider. Kun magpadayon sila niining ilang pagkatug sa pansitan tingalig mamali na hinoon kining ilang mga dumadapig. Kining ako unsolicited advice lamang nga mahimong ibasura sa mga kandidato sa LP.

* * *

Si Kong. Tomas Osmeña nanghimakak sa taho nga kalit siyang mibalik sa US kay misugmat ang iyang sakit nga cancer. Nagpa-checkup kuno siya og sayo aron makabuylo na siya pagpangampanya sa mosunod nga mga adlaw. Agig bawos gipahibawo sa iyang kampo nga si Mayor Mike Rama aduna kunoy prostate cancer. Gihimakak usab kini sa mayor.

Kining cancer ni Osmeña iya na nga giangkon. Wala pa usay tambal nga makaayo sa cancer. Mapugngan lang kini aron dili makakatap sa ubang parte sa lawas.

Kining giingong prostate cancer ni Mayor Mike wala pay kamatuoran. Makita usab nato sa nawong sa mayor nga mora’g wala siya maghambin og grabeng sakit sa lawas.

* * *

Akong panghinaut nga unta maayo na gikan sa ilang tagsatagsa ka sakit ang mga kauban nato sa broadcast industry nga sila si Marlon Bellita sa ABS-CBN, Bong Soriano ug Bert Palang nga akong mga kauban kaniadto sa Bombo Radyo. Moawhag usab ako sa mga malumo og kasingkasing sa pagtabang niining mao natong mga higala. Nagkinahanglan usab sila sa inyong mga pag-ampo.

* * *

Happy golden wedding anniversary ngadto sa akong suod nga higala nga si kanhi radio station manager Sammy Galarpe ug sa iyang kapikas nga gisaulog kagahapon. Tua na sila sa US magpuyo apan mibalik gayud dinhi sa Sugbo aron pagsaulog sa ilang wedding anniversary. Congrats!

Email: [email protected]