Environment Code ni Teddy Ouano

Apektado ang Pilipinas sa duha ka dagkong politikanhong panghitabo sa kalibutan – ang presidential election sa Amerika tali nilang incumbent US President Barack Obama ug Republican presidential candidate Mitt Romney ug ang political succession sa China diin si Chinese President Hu Jintao pulihan sa iyang bise presidente Xi Jinping.

Sa bulag nga political exercises sa Amerika ug China, kining territorial dispute tali sa Pilipinas ug China ang labing apektado. Apan maayo na lang kay giduso ni Presidente Noynoy Aquino nga matuki sa ASEAN 9 (Association of Southeast Asian Nation Meeting 9) sa Laos nga matuki ang panag-ilog sa teritoryo sa West Philippine Sea. Ang nakapatandog nako mao ang resolusyon nga gipangamahanan ni Bokal Teddy Ouano sa siksto distrito sa lalawigan sa Sugbo nga gitumong pagsuporta sa malinawon nga lakang sa Pilipinas pagresolbar sa panag-ilog sa teritoryo sa West Philippine Sea.

Sa resolusyon ni Ouano, gipanawagan niini nga kinahanglang maghiusa ang mga Pilipino, ilabi na ang mga Sugboanon aron pagsuporta sa “peaceful efforts” sa kagamhanang nasyonal sa nasud.

Sa pakighinabi niini pinaagi sa telepono, si Ouano nagkanayon nga ang Pilipinas kinahanglan mo-assert sa mga tinguha niini nianang teritoryo sa West Philippine Sea, apan kinahanglan sa malinawon nga pamaagi.

* * *

Si Ouano usab maoy nakahimo og “compendium” sa mga balaod sa kalikupan alang sa probinsiya sa Sugbo.

Tungod sa iyang mga paninguha, na-umol kining dugay na nga gipaabot sa lalawigan nga mao ang Environment Code of Cebu Province.

Ning maong kodigo mabasa ang tanang mga balaod sa kalikupan nga haum alang sa Sugbo, ug dinhi usab makit-an ang mga balaod nasyonal nga angayan ipatuman dinhi.

Si Ouano, sa pakighinabi pinaagi sa telepono, miingon nga gitabangan siya sa iyang paryente nga si Ely Ouano nga kanhi opisyal sa Environmental Management Bureau sa nasud ug karon consultant on environment na sa Asian Development Bank (ADB), sa pagpanday sa Environment Code.

Dugay na kaayong gikinahanglan sa lalawigan kining maong Environment Code, apan usa ka kanhi mayor sa industriyal nga siyudad sa Mandaue ang nakahimo niini. Si Ouano mao karon ang chairman sa environment committee sa Hunta Probinsiyal sa lalawigan sa Sugbo.

Si kanhi Bokal Victor Maambong nga kanhi chairman sa maong komitiba wala gani makapasar og environment code, sama sa napangamahanan ni Ouano.

Laing giduso ni Ouano mao ang pagpatuman sa Cebu Provincial Fisheries and Aquatic Resources Code.

Kining maong fishery code sa lalawigan nga gipangamahanan gihapon ni Ouano nga ubos sa Ordinance No. 2012-05 napirmahan na ni Gob. Gwendolyn Garcia ug napublikar na sa pamantalaan.

Busa, mahimo na kining ipatuman batok sa mga ilegal nga panagat.