Ang Senior Citizen

Kun ikaw anaa na sa edad nga 60 anyos, congratulations !! Miyembro ka na sa senior citizen, ang buot ipasabot ani nga opisyal kanang batan-on nga senyor. Niining maong estado, angay nato nga himuon na natong prayoridad, ang luho o lifestyle nga mohaom sa atong pagka-senyor kun buot kita modangat pa nga makaabot sa himsog gihapon nga mahimong edaran nga senyor. Lapas 120 anyos tiguwang kanang senyor. Apan sa mga eksperto, ang 100 nga edad, mao kini ang mortality rate o sagad nga edad nga kabuhian sa atong panahon. KUN:

Ang pagkamalipayon, pakighimamatay, pakigsandurot, matinabangon, lapad  nga panghunahuna, ug pagtinambagay. Pipila kini sa positibo nga hiyas nga mopaugmad sa unahan pang pagpanginlabot diha sa dakung kapuslanan nato sa katilingban. Busa atimana ang pagmintinar sa kabaskog sa panglawas.  Ayaw na patuyang nga kun unsay gusto sa atong hunahuna, disiplinaha nga  motaas pa ang pasundayag ning nahibilin nga pipila ka anib sa atong kinabuhi.

Ayaw na kawili ning kalibutana. Ang buhaton ta, mangandam sa mga maayong buhat, aron igasa nato sa magbubuhat inig-abot sa pahulay nga dayon. Likaye ang kasuko kay mopaugtas kini sa tandugon tang straktora sa panglawas. Maghinayhinay ug ginagmay nay kaona. Kun mahimo likaye ang karne, kay di na kasugakod ang digestive system. Mag-natural food supplements. Ipuasa nang mga mantikaon, ilimnong alcohol, soft drinks, sobra ka hinam-is ug sa kaparat. Maoy kalingawi ang mga prutas , utanon ug lagutmon isip mga luhong pagkaon .

Kanunay usab nga maglakawlakaw, para di mapug-ok o manuskig ang kaugatan. Inom daghang tubig. Ayaw painit sa adlaw. Likaye ang pagpamuwaw.