Mga adik nga drayber

Makapanglimbawot sa balahibo kining taho nga daghang mga drayber sa pangpublikong sakyanan ang tiggamitan og ginadiling druga. Angay gayud nga mohimo og dinaliang aksiyon ang otoridad aron malikayan ang mga disgrasya sa kadalanan mugna niining adik nga mga drayber. Basi sa report sa niaging mga adlaw, mokabat sa 19 ka drayber sa public utility jeepney ug pampasaherong bus ang positibo sa druga. Kining maong mga drayber kabahin sa 90 ka mga drayber nga gipailalum sa drug test nga gipahigayon sa Land Transportation Office niadtong niaging semana.

Angay nga ikansela ang lisensiya niining maong mga drayber. Kinahanglan nga dili na sila padraybon pa og bisan unsa nga klaseng sakyanan. Kini tungod kay delikadong makaangin sila og mga inosenteng kinabuhi.

Ug angay lamang usab sila nga ipailawom sa rehabilitasyon aron sila mareporma. Kini aron sa ingon nga makabalik pa sila sa ilang panginabuhian sa higayon nga limpiyo na sila gikan sa druga.

Dili ikalimod nga adunay daghang mga drayber sa mga pangpublikong sakyanan ang tiggamitan og druga. Gani, komun na ang pagsuyop og shabu ug uban pang klase sa druga alang sa ubang mga drayber aron lagi dili sila magduka sa ilang pagmaneho, ilabina kun lagyo ang ilang mga destinasyon.  

Ang nakapait tungod kay adunay mga tag-iya sa mga depasaherong bus ug jeep ang nahibalo nga tiggamitan og druga ang pipila sa ilang mga drayber apan kulang sila sa aksiyon. Kini tungod kay dili ikalimod nga dako man usab og kita kining maong mga drayber tungod sa tabang sa gidiling druga.  

Apan tungod sa pagkawalay maayong paminsar sa utok dala ning maong bisyo, dili layo ang disgrasya. Gani daghan nang kinabuhi ang nakalas gumikan sa mga drayber nga walay tarong panghuna-huna tungod sa ilang pagkalango sa druga.

Angay lamang hingusgan sa otoridad ang ilang kampanya batok niining mga drayber nga tiggamitan og druga. Dili kini sila angay padraybon samtang anaa nagtuyok pa sa ilang utok ang kagaw mugna sa druga.