Balaod sa gugma

NOB. 4, 2012: Ika-katloag usa- nga Domingo sulod sa tuig 

Mga Pagbasa:  Dt. 6; 2-6/Sal. 18/Heb. 7;23-28/Mk. 12;28b-34

Usa na ko ka higala ang mihatag sa iyang komentaryo sa usa ka tawong anaa hiagi sa among tungod. Siya niingon: “Sus, kanang tawhana grabe kasipat ug  kabarumbado kaniadtong ulitawo pa! Pero karon, bisan ang pagdimdim sa bisan unsang ilimnong makahubog ang maglikay na!” Minyo na ang maong tawo.

Pasalamat siya sa iyang asawa nga maoy nagdala kaniya sa maong kausaban.Ang maong kausaban wala magsukad sa iyang asawa mismo lamang kondili sa mahinungdanong panghitabo tali kanilang duha ug kini ang paghigugmaay nila. Kun tinud-on lamang ug dili dula-dulaan ang gugma, magdala gyud kini og kaayohan sa mga tawong nalambigit niini. Kini ang kahulogan sa milagro, adunay kausaban sa tawo.

Ang maong kausaban ang sa kanunay magpunting sa kaayohan ug sa pagpalutaw sa kaayo nga nahipatik nang daan sa kinaiya sa tawo. Ang atong Ginoo bitaw, na hianhi sa kalibutan aron diha sa iyang pagpanudlo ug sa paghimo og mga milagro, ang mga tawo makaamgo nga sila diay mahinungdanon, dunay maayo ug makahimo og maayo nga adto sa uban.

Kini ang buot ipadayag sa atong Ginoo sa atong Ebanghelyo karong Domingoha. Ang molangkob sa tanang mga balaod mao ang Balaod sa gugma nga naghatag og kahulogan sa kinabuhing tawhanon.