ARANGKADA Ni Leo Lastimosa

Chong Hua Hospital, Cebu City—Human nanihapon niadtong Martes sa gabii, nananghid si Marlon Bellita nga matug siya og sayo. Kay nahibawo siya sa kadaghan sa among mga gimbuhaton sa kataposang adlaw sa rehistrasyon sa mga botante ug sa bisperas sa kalagkalag.

Apan dihang naghigda na, gipaningot siya og bugnaw ug gisakitan sa ulo. Gihilot sa iyang asawang si Hazel ug gipatomar og paracetamol. Naglain gyud tingaling iyang paminaw kay nanawag siyang Juve Villar sa desk sa DYAB Radyo Patrol ug namalihog nga isibya sa programa ni Najib Cubio nga paadtuon sa ilang bay ang iyang suki nga manghihilot.

* * *

Iyang inahan, nga nagpuyo sa ilang bay sa San Isidro, Talisay City, mabalak-on nga nagsusi sa iyang kahimtang. “Ayaw pagkomedya ha!,” nipasidaan siya. Nitubag si Marlon sa hinay ug nagkanguhal nang tingog, “Wa ko magkomedya.”

Maong gidali nila pagda si Marlon dinhi. Niabot sila pasado alas-9 sa gabii. Nawad-an si Marlon og panimuot pagka alas-4 sa kaadlawon busa gibalhin sa Intensive Care Unit (ICU). Wa pa siya makamata gikan sa lawom nga coma samtang nagsuwat ko ini.

* * *

Si Dr. Angelique Limquiaco, pangu sa mga doktor nga nag-atiman ni Marlon, nipasabot sa nahitabo niya: Nibuto ang ugat sa iyang utok tungod sa taas nga presyon sa dugo; ang bahin sa utok nga naapektahan maoy nagkontrolar sa respiratory system maong di makaginhawa si Marlon kun di abagan og ventilator.

Matud ni Limquiaco di nila ma-operahan si Marlon kay ang naapektahan naa sa tungatunga sa utok, nga maabot lang pinaagi sa pagtandog sa ubang bahin sa utok, nga posibleng makadaot sa ubang bahin sa lawas ni Marlon. Ilang mahimo mao na lang ang pagtabang sa pagginhawa ni Marlon hangtod nga mohunong pagpitik ang iyang kasingkasing.

* * *

Ang minilyon ka fans ni Marlon maglisod og dawat sa kakalit sa nahitabo niya. Gi-replay namong kataposan niyang sibya nga puno sa kahadlok nga mahimong mahilom nang usa sa labing gipangga ug gikalingawang magsisibya sa Sugbo, Kabisay-an ug Mindanao. Ug ang kapin sa kawhaan niya ka tingog.

Labing dakong haw-ang mabatyagan sa iyang pamilya. Nga hingpit nga nagsalig ni Marlon. Maong iyang kaparyentihan ang labing nahugno. Bisan ang labing beteranong mga doktor dinhi natandog pagkakita sa bugtong anak lalaki ni Marlon nga nag-ubay pag-abot nila dinhi ug nituaw, “Mata na, Daddy!”

* * *

Bisan pakatawa ang programa ni Marlon sa radyo, siya’y labing daghan og natabangan sa labing kabos ug labing masakiton nga mga pasyente nga nidangop sa sibyaanan.

Ning higayona, tuguting kami ang mangayo og tabang alang ni Marlon. Gikinahanglan niya ang mga pangaliya. Nga segun sa mga doktor mao na lay makaluwas niya.

* * *

Email: [email protected]