LINTUNGANAY Ni Fred Languido
Sugod gahapon gitangtang na sa Kapitolyo ang singko pisos nga terminal fee diha sa South Bus Terminal.
Maisip ni nga sayo'ng pinaskuhan sa kagamhanan sa probinsiya sa Sugbo ngadto sa mga kabus nga nagping-it sa kalisod.
Apan dili ko'ng kasabot nganong inay magpasalamat sa nakab-ot nga hukom sa pamunoan sa lalawigan duna lang gihapoy mga tawo nga nisaway ug mihulagway sa maong lakang nga pamolitika.
Sagad hinuon sa ako'ng nadunggan nga nanaway ug miingon nga namolitika ang probinsiya mao kadtong mga tawo nga klarong sinuholan og politiko o ba kaha nagpatagad kay buot mokabyon sa abaga sa kasamtangang administrasyon sa probinsiya apan wala gyud panumbalinga nga sa laktud "irrelevant".
Usa ko sa mga hugtanong misaway sa pamunoan ni Gobernador Gwen Garcia dihang iyang gisugdan pagpatuman ang P5 nga terminal fee.
Unsa may motibo ug hinungdan niining iyang hukom pagtangtang niini alang nako dili na mahinungdanon. Ug tugoti nga usa ko sa unang mopadangat sa pasalamat sa ngalan sa mga pasahero.
Ang mahinungdanon mao nga naibtan intawon og tunok ang mga kabus nga sumasakay gikan sa habagatang bahin sa lalawigan.
Ang mga kritiko nagkanayon nga posible kuno nga gituyo ni sa gobernador aron suportahan sa katawhan ang iyang igsuon nga si Kongresista Pablo John Garcia.
Ang tinuod si Pablo John maoy posibling naghangyo sa iyang igsuon nga hunongon na ang terminal fee.
Kini tungod kay sa katapusan nakong mahinumduman nga interview kaniya usa gyud sa iyang mga tinguha kun mamahimong gobernador mao ang pagtangtang niini.
Kun kini pamolitika alang sa uban, alang nako maayo nga matang sa pamolitika.
Kabulahan kaha sa katawhan kun ang matang sa pamolitika sa usa ka opisyal mao ang pagtan-aw unsay makaayo alang sa kinabag-an.
Dili ba ingon man niini ang matang sa lider nga atong gipangandoy?
* * *
- Latest
- Trending
