Daghang drayber adik

 Sa 90 ka mga drayber sa bus ug mga jeepney nga pasaheroan nga gikalit og drug test sa taga Land Transportation Office kaniadtong Martes 19 kanila ang nagpositibo sa paggamit og ginadiling drugas. Sa 19, tulo (3) kanila ang mga bus drayber ug ang (16) mga drayber sa dyip.

Sa mga nangaging buwan may ubay-ubay na usab nga mga drayber ang nagpositibo sa paggamit og ginadiling drugas sa mga kinalit gihapong drug test nga gipasiugdahan sa Land Transportation Office (LTO) ug Land Transportation Franchising and Regulatory Board (LTFRB).

Ang kinalit nga roadside drug test gihimo isip kabahin sa Oplan Ligtas Biyahi 2012 pero murag nauwahi tungod kay aduna nay 7 ka mga kinabuhing nakalas og kapin sa 40 ka mga pasaherong naangol human mabangga ang bus nga ilang gisakyan nga gipanag-iya sa Jegans Bus Liner didto sa Toledo City.

Ang ako lang nganong aduna may mga drayber nga adik? Ang akong nahibaw-an dili ni sila hatagan sa ilang lisensiya sa  pagka drayber kun dili mapaubos sa drug test. Pero nganong aduna may mga nakamaneho og sakyanang pasaheroan nga mga adik?

Ang mga pampublikong sakyanan dili angayang isalig sa mga drayber nga adik ug kinahanglan gayod nga hawanan ang mga sakyanan sa mga drayber nga adik tungod kay peligro ang kinabuhi sa mga pasahero maong awhagon nako pag-usab ang LTO ug LTFRB nga sa tanang higayon ipahigayon gayod ang kinalit nga drug test. Mas maayo upod nga tan-awon sa nahisgotang mga buhatan ang mga drug testing center tungod kay duda nako mabayran ang resulta sa ilang drug test maong adunay mga adik nga nakalusot.