Mosango sa balaud

Gihapak gayud og petisyon si Cebu City Councilor Augustus “Jun” Pe mahitungod niining iyang pagdagan alang sa Konseho didto sa south district. Konsehal pa sa north district si Pe. Apan dili na siya kadagan didto gumikan kay ikatulo na kini niya nga termino.

Apan unsay nasulod sa iyang ulo nga mibalhin man siya og puyo ngadto sa south district aron lamang makabotar siya didto sa sunod eleksiyon. Ug kay rehistrado na siya didto sa south, gipadayon na hinuon niya ang iyang plano nga mokandidato sa konseho bisan pa man kun ikatulo na niya ka termino sa north.

Aron pagpakgang sa iyang plano, duha ka kandidato pagkakonsehal sa Team Rama ang mipasaka og petisyon sa Commission on Election pag-disqualify kang Pe. Matud nila nga klarong kalapasan sa Local Government Code ang pagdagan pag-usab ni Pe sa konseho tungod kay anaa na man siya sa ikatulo ka termino.

Anaa na karon sa mga kamot sa Comelec ang bola. Modesider unya kini sa kapalaran sa konsehal. Kun matangtang ba si Pe sa listahan sa mga kandidato pagkakonsehal, ato na lamang atangan.

Hinuon, kun si Pe ang pangutan-on, dili kalapasan sa balaud ang iyang pagkandidato sa south. Kini tungod kay lahi kuno kini nga distrito bisan pa man kun pareho gihapon nga konseho ang iya unya nga alagaran kun palarang modaug siya.

Klarong iyang gisulayan ang balaud. Sa tibuok nasud, siya pa ang nakabuhat niini. Mao nang daghan ang nagtutok sa iyang sitwasyon karon. Ug kun mosaler kining petisyon batok kaniya ato lamang usab nga atangan.

Alang kanako, insakto ang pangagpas sa uban nga hinakog sa gahum kining pagkandidato ni Pe. Kini tungod kay klarong gikulit sa balaud nga dili na gayud makadagan pa sa maong posisyon kadtong mga opsiyal nga anaa na sa ikatulo nga termino.  

Apan bisan kun katungod niya ang pagdagan sa south, diin siya bag-o nga rehistrado nga botante, mosango gihapon siya sa balaud tungod sa rason nga susama nga konseho lamang ang iyang daganan.

Daghan ang nakapangutana nganong dili na lamang siya makahulat sa 2016 aron pagdagan pag-usab. Unsa bay anaa sa konseho nganong dili man kabiya si Pe bisan usa lamang ka termino?