Taas ug tulokibon kaayo ang kinabuhi ni Pedro Calungsod hinungdan nga sa Oktobre 21 mosaka na siya sa langit.
Pagkahayahay ra ba sa tawo nga mahalangit, suma sa Biblia kay wa ka nay kamatayon didto sama sa anghel sa langit nga malipayon kaayo ug ang dakong trabaho nila didto mao na lang ang pagsimba sa Dios nga maoy nagbuhat sa tanang mga butang sa kalibotan
Ang unang mga tawo nga nakasaka na sa langit mao sila si Cristo, Elias ug Inok, ug gawas kanila, wa nay laing tawo nga nalista sa Biblia nga nakasaka sa langit.
Sa tulo, si Cristo ray nakatilaw og kamatayon apan si Elias ug Inoc pulos wa makatilaw og kamatayon.
Tinuod ang matag tawong mamatay, mobalik ngadto sa Dios ang espiritu niini nga mao ang iyang gininhawa o kinabuhi, apan ang iyang lawas ug kalag madugta ra sa yuta kay ang iyang lawas mao man ang iyang unod ug bukog, samtang ang iyang kalag mao ang iyang huna-huna nga mugna sa kasingkasing ug utok, nga parti ra sa iyang lawas.
Ang ubang makasaka sa langit nga di makatilaw og kamatayon unya pa inigbalik ni Cristo nga mao ang mga Iya ni Cristo kinsa maabtan Niyang buhi.
Kauban sila sa mga pinili Niya nga anaa pa sa lubnganan karong panahona apan mobangon sa pagsugat Kaniya sa iyang pag-abot nganhi sa yuta suma sa Biblia.
Tin-aw usab sa Biblia nga human sa 1,000 ka tuig , liwas sa pag-anhi ni Cristo sa yuta buhion sa Dios ang tanang tawo nga anaa sa lubnganan nga di Iyang mga anak ug itambog ngadto sa impiyerno.
Suma sa Biblia ang ilang gidaghanon sama sa bas sa dagat, ug maayong susihon karong buhi pa ta kun unsay paagi nga di ta ma-impiyerno kay suma ra ba sa Biblia, ang matambog didto wa na say kamatayon ug ang aso sa ilang pag-antos maga-utbo sa katuigang way katapusan diin adlaw ug gabii mokagut ang ilang mga ngipon sa hilabihang kainit sa kayo nga inubanan sa asupri.