Nakapahinumdom naku sa makalagot apan makalingaw nga kasinatian sa didto pa ko sa Siyudad sa Cagayan de Oro.
Human sa makahahadlok naku nga kasinatian sa “spirit of the glass” dili ko na lang iapil sa pag-asoy, 9 anyos ko niadtong tungora, sa samang panuigon nakombinser ko og laing seremonya gitawag og spirit of the plate.
Bisan diduso tungod sa unang kasinatian napugos ko kay daghan man pud mi. Gisulod mi og kwarto nga gipaw’ng ang suga. Gitagaan mi matag usa og lusa. Ang nango sa seremonya mipasalig namo nga makita namo ang among paboritong artista inig pasiga sa suga, apan sa dili pa kinahanglan hilamon namo ang ilawom sa lusa ipahid sa among nawong sa krus nga paagi og ika 21 ka higayon.
Sikat man niadto si Rey Malonso mga early 80’s siya maoy akong gi-wished nga makita inig pasiga sa suga.
Tuod man nagsugod nami’g kuros sa among nawong, nahibong ko kay dangogdangog man ang ilawom sa lusa, pero tungod kay makakita kag artista naniguro gyud kog pahid sa akong nawong. Ang nakadimalas naku kay nalipat ko sa akong ihap mao nga gibalik naku sa uno hangtod sa baynte uno ang akong pagpahid sa nawong.
Nagpiyong pa ang among mga mata dihang gipasiga ang suga, dayong ihap sa nangulo sa seremonya og katulo aron bukhon namo among mga mata.
Hastang unggoya! Pagbuka namo sa among mga mata inay artista, ang among mga panagway nga nagkabulingit sa uling ug mantika ang among nakita. Makalagot man apan buhakhak ang milanog adtong higayona tungod sa nagkabulingit namong mga panagway.
What a sad story!(Toink!/Aguy!) Hehehehehehehehehehehe!
Dunay nakasulti naku nga sa wala pa daw masudli ang mga tinun-an og daotang espiritu diha sa Jaclupan National High School nagsugod ang sugilanon sa spirit of the paper. Unang tinun-an nga giingong nasudlan nahitabo niadtong buwan sa Septiyembre apan wala ni manakod.
Ikaduha na daw nga tinun-an ang nasudlan niadtong Lunes nga nanakod na sa ubang mga tinun-an sa tulonghaan apil na sa usa ka igsoon ug usa ka inahan.
Nagkasabong ang mga opinyon. Alang sa uban hysteria ang nahitabo apan sagad sa mga molupyo sa Barangay Jaclupan pabor sila sa pamahayag ni Monsenyor Fred Kreikenbeek nga mga daotang espiritu gyud ang misulod sa mga hingtungdan.
Ang nahitabo mahimong makapabuka sa mga mata sa mga kuwang na og pundasyong espirituhanon. Makaayo ni pagpahiuli sa pagtuo ug pagpahugot pa sa pagtuo sa labaw’ng makakagagahum.
Sa laing bahin makagiya sab sa mga hingtungdang ahensiya ang sikolohikal ug medikal nga aspeto sa tinud-anay nga kahimtang sa pamuyo sa mga naapektahan.
Alang naku pulos makaayo ug makahatag og benepisyo dili lang sa mga hingtungdan ang pagsusi sa duha ka tiyuriya nga hinungdan sa pagsalimuang.
Buloy: Bay nganong maghinay man gyud ka musulod sa balay inig-uli sa inyo?
Bitoy: Makamata unya ang white lady.
Buloy: Ha! Naa diay white lady sa inyo?
Bitoy: O akong asawa (Toink!/Aguy!)
Hehehehehehehehehehehehehe!
(emailad:jomar_bellita@yahoo.com)