Ang canonization ni Blessed Pedro Calungsod

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.     

Nagkaduol na ang Oktubre 21, niining tuiga nga maoy gikatakdang adlaw sa pagpahigayon sa canonization ni Blessed Pedro Calungsod nga pagahimoon didto sa Vatican City sa Roma.

Giisip kining maong adlaw nga labing makasaysayanon alang sa mga Katolikong Sugbuanon sanglit sa unang higayon maoy atong maangkon ang usa ka Santos nga Sugboanon nga nahimong martir sa pagtuo sa atong Labaw nga Makagagahom.

Nunot niining nagkaduol na nga adlaw sa iyang canonization daghan ang nag-ingon nga ang mga relihiyosong katawhang Sugbuanon nga makasarang sa galastohan sa ilang pagbiyahe ngadto sa Roma dili gayod kini magpanuko sa pagtambong sa maong kalihokan nga pangulohan sa Santo Papa.

Matud pa nila nga ang tataw kaayo nga motambong sa canonization ni Blessed Pedro Calungsod mao ang mga dagkong magpapatigayon, mga inilang politiko ug mga opisyal sa kagamhanan sa pamasin nga makabaton kini og dugang grasya ug panalangin.

Gitataw hinuon nila nga ang mga maong hut-ong natong katilingban dinhi sa nasud maisip nga tipik lamang sa atong kadagkoan sa simbahang Katoliko dinhi sa nasud nga motambong sa maong kalihokan nga naglakip kanila ni Arsobispo Jose Palma ug arsobispo emiritos nga si Ricardo Cardinal J. Vidal.

Nunot sa maong adlaw sa pagpasiugda sa kalihokan didto sa Vatican City maoy ilang pagtuo nga maoy modagsang sa maong dapit ang mga dagkong negosyante nga Pilipino ug politiko sa pagpatigbabaw usab sa ilang Kristohanong pagtuo.

Ang mga kabus nga relihiyosong Katoliko dinhi sa Sugbo maoy atong mapaabot ang panagtapok sa mga simbahan sanglit ang atong kaparian nga mahibilin niining higayona magpasiugda man usab og mga kalihokan nga gipahaum sa canonization ni Blessed Pedro Calungsod nga maoy unang Santos nga Sugbuanon.