Daghan ang nag-ingon nga dugang pa gayod untang mga kalamboan ang maangkon sa dakbayan sa Mandaue kun hingpit na gayod nga kahatagan og katumanan ang dugay na nga gitinguha nga paghimo niining Lone Congressional District dinhi sa lalawigan sa Sugbo. Matud pa nila nga sa paghimo unya niining usa ka distrito makabaton kini og ilang kaugalingong kongresista nga molingkod sa ubos Balay Balaoranan.
Dugang pa nila nga kun adunay maglingkod nga kaugalingong kongresista ang mga Mandauehanon tataw usab nga makabaton kini og iyang kaugalingong Priority Development Assistance Fund (PDAF) nga mokabat sa P70 milyones sa matag tuig.
Ang maong kantidad maoy magamit sa ipatuman nga mga proyekto sa 27 ka barangay sa dakbayan nga naglakip sa pagpalambo sa kadalanan ug mga kanal ug pagpatukod og dugang pa nga mga lawak saringan sa mga publikong tulunghaan.
Kun atong kahinumdoman ang paghimong Lone Congressional District sa maong dakbayan unang gitinguha ni Board Member Thadeo Ouano dihang mao pa kini ang mayor sa dakbayan.
Sa tuig 2000 iyang gihimoan og lakang ni kanhi 6th District Congressman Efren Herrera pinaagi sa iyang gipangamahanan nga balaodnon nga paghimong Lone Congressional District sa dakbayan apan wala na ikapadayon kay naabtan man kini sa piniliay niadtong 2001.
Ang maong tinguha sa dakbayan subli karon nga gipatugbaw ni Mayor Cortes ug ang paghatag og katumanan mag-agad usab sa mga pagpaningkamot sa modaug nga kongresista human sa 2013 mid-term election nga ubos karon sa panag-atbang ni Kongresista Luigi Quisumbing ug kanhi Kongresista Nerissa Soon-Ruiz.