Nagpadayon ang kalamboan sa Liloan

Daghan ang nag-ingon nga ang usa sa mga lungsod sa amihanang bahin sa lalawigan ilang hipanglantawan nga makabaton pa og dugang kalamboan sa umaabot nga katuigan sanglit daghang nagpaabot nga maayong kahigayonan sama sa gipangtukod nga dagkong patigayon sa lungsod sa Consolacion.

Hinuon ilang gipadayag nga ang maong kahigayonan sa kalamboan ilang gisandig ngadto sa mga opisyal sa kagamhanan nga maoy ilang gitahasan sa pag-angkon sa gipaabot nilang dugang pa nga mga kalamboan.

Sa nasayran nga nagpasubli sa iyang ikatulong termino si Mayor Vincent Franco “Duke” Frasco sa 2013 mid-term election ug dihang nahinabi sa mga tigbalita iyang gipadayag ang pagpatuman sa nagkalain-laing mga proyekto sa maong lungsod.

Naglakip sa iyang gihimo mao ang pagpatukod sa sports complex nga unang gisugdan sa iyang amahan nga si Mayor Panphil “Dodong Daku” Frasco.

Giangkon ni Mayor Frasco nga nasugdan na niya sa paghimo ang mga proyekto ug ang maayong serbisyo sama sa mga pasyente nga madala sa Eversely Child Sanitarium Hospital sa dakbayan sa Mandaue ug ang palambo sa edukasyon ug paghatag og scholarship program sa kabataan.

Sa tabang sa iyang mga kauban nga naglakip ni Bise Mayor Lucilito Pilapil, ug mga konsehal nga sila si Edna Cala, Lurgio Canete, Francisco Comendador, Thelma Jordan, Ferdinand Jumapao, Bernard Lopez ug Leo Salundagit nga pulos usab magpasubli sa katungdanan.