EDITORYAL - Ang risgo sa taga media sa pamalita

Nagkalain-lain ang risgo sa taga media sa natad sa pagyagyag sa mga kasayoran nga ilang makapkap batok sa indibidwal, partido, relihiyon, organisasyon ug uban pang pundok kansang prinsipyo matandog gumikan lang sa sayop nga paghagpat ug pagsabwag sa tukmang kasayoran.

Ang kadanghag o   pagkalipat o negligence di kalikayan sa matag tawo ilabi na sa mga tigbalita kansang hunahuna anaa sa paningkamot nga makabutyag og mga butang illegal o kaha mga butang nga makapadaot sa iyang tinubdan sa balita .

May taga media nga way laing tinguha gawas sa pagkahimong popular sa iyang ngan sa natad sa pamalita, bahala na kun masuko kaniya ang iyang tinubdan.

Adunay taga media nga mohimo lang og balita sa isugilon kaniya sa iyang tinubdan basta mohatag kini og suhol kaniya.

Apan ang mga tigbalita kansang gihatagan og gibug-aton mao ra ang pagpaburot sa iyang kaugalingon pipila lamang kini sila ka buok, kay nag-anam na og kamatay kay gituyo sa pagpatay niadtong nasakitan sa ilang mga balita nga gipaagi sa komentaryo sa radio, pamantalaan, telebisyon, magazine , libro ug uban pang basahon nga nagdaot sa ilang isigkatawo.

Kay mayoridad sa mga tigbalita sinsero sa trabaho, gihimong limpyo niyang panginabuhi ang iyang pagka-periodista busa di abusado kay nagbantay sa iyang kridibilidad ug prestihiyo.

Naglikay nga kahatagan og mansa ang iyang pagkatawo   ug naningkamot sa pagpanalipod sa iyang dungog alang-alang sa iyang pamilya, relihiyon ug labaw sa tanan sa iyang prinsipyo.

Busa kun maligas siya o masayop nga di tinuyo, di kaayo sakit sa iyang hunahuna  ug di usab kaayo siya mauwaw tungod kay maisip man nga honest mistake ug ang sayop nga ingon niini gaan nga mapasaylo o excusable. Apan sa bahin niadtong nagsuwat sa isyu nga smuggling sa tango o sungay sa elepante nga ivory angay baya tingale nga sutaon ang iyang sinuwat kun wa bay kamatuoran .

Kay kun bakak ang iyang gisuwat nga nakapabokal sa kapungot sa mga kaparian, angay gyud siyang ideklarar nga persona non grata ug papangayuon siya og pasaylo o kaha pasakaan og kiha nga libelo sa hukmanan, apan kun tinuod, nganong di man dawaton ang maong kamatuoran sa hingtungdan.