Kinsay nagtabon ni Garcia?

Kinsay nisuspenso ni Msgr. Cris Garcia tungod sa eskandalo sa giingong pagpanamas-tamas niya og duha ka batang lalaki? Segun ni Cebu Archbishop Jose Palma igo lang niyang gipatuman ang sugo sa Vatican. Kinsay nitago gikan sa publiko sa pagkasuspenso ni Garcia sugod niadtong Hunyo ning tuiga? Ang kadagkoan sa Artsidyosesis sa Sugbo. Nga sa niaging semana pa lang nipahibawo sa silot ni Garcia dihang gipakisayran sa media sa lab-as ug lahi nga kontrobersiya sa pari.

Kinsa man ang responsable nga nagdungan og ulbo ang duha ka kaso? Sa ngan sa Ginoo, di makiangayon nga ang kaparian modayon og tulisok ngadto sa ilang giisip nga kalibotanong kampanya batok sa simbahan.

* * *

Daghang salamat sa kanihit sa kasayuran nga gihatag nilang Arsobispo Palma ug kaubanan, ang mosunod mao ray atong nahibaw-an sa sex scandal nga gipasangil batok ni Garcia duha ka dekada na ang nilabay:

• Madre maoy nakasakop ni Garcia nga nakigdug og duha ka altar boys dihang didto pa sa Estados Unidos nag-alagad ang Sugbuanong pari;

• Gipasabot ni Garcia nga tinuod nga nakighilawas siya sa mga bata apan siya maoy gitental ug siya maoy gilugos;

• Usa sa duha ka bata niangkon nga gibayran siya ni Garcia aron nga di mopasaka og kasong kriminal;

• Gipalagpot si Garcia sa Dominican Order; ug

• Nipauli si Garcia sa Sugbo ug gidawat siya ni Ricardo Kardinal Vidal ug gihatagan og mahinungdanong mga katungdanan sa artsidyosesis.

* * *

Nganong gibanhaw man sa Vatican ang kaso ni Garcia? Ang mas maayong pangutana: Nganong naabtan man ang Vatican og 20 ka tuig sa pagtuki sa eskandalo nga naglambigit sa usa sa labing dakong haligi sa artsidyosesis nga gipasidunggang duyan sa Kristiyanismo sa Asya?

Unsa man ang implikasyon sa pagpanginlabot sa Vatican sa kaso ni Garcia? Wa ba sila matagbaw sa imbestigasyon nga gipasiugdahan ug sa silot nga gipahamtang sa Dominican Order batok ni Garcia? Wa ba sila makauyon sa kapaspas sa pagpasaylo ni Kardinal Vidal ni Garcia, nga kaambasan lang sa kapaspas sa iyang promosyon pagka monsenyor ug pagkatudlo sa mahinungdanong mga katungdanan sa artsiyosesis?

* * *

Way laing mabasol ang kaparian sa Sugbo sa kalangay sa pagpahibawo sa pagkasuspenso ni Garcia. Silang Arsobispo Palma ug kaubanan ang angay’ng mopasabot nganong naghuwat sila sa pagpagawas sa kalibotanong telebisyon sa mga detalye sa ilegal nga negosyo sa ivory, kansang usa sa mga tinubdan mao si Garcia?

Gihangop sa katawhan ang baruganan sa Simbahang Katoliko pagsupak ug pagsusi sa anomalusong mga transaksiyon sa gobyerno ug pagpaluyo sa dugay nang giyak-an nga Freedom of Information bill. Hinaot nga mapiskan og diyutay ang kaparian sa gusto nilang palambuon sa gobyerno nga mithi sa kamatinud-anon.

* * *

Email: [email protected]