Nakalimot si Tomas

Si Presidente Noynoy Aquino ang mabasol nganong miresulta sa panagbangi tali nilang Senate President Juan Ponce Enrile ug Senador Antonio Trillanes IV. Kay samtang padayong naglangkob sa Philippine mission si Foreign Affairs Secretary Albert del Rosario ngadto sa China aron paghilot sa panagbangi tali sa Pilipinas ug China tungod sa panag-ilog sa teritoryo sa West Philippine Sea, iyang gipadala si Trillanes sa Beijing alang sa back-channel negotiation.

Karon usab, ang gipadala ni Noynoy sa China si DILG Secretary Mar Roxas.

Hain naman diay si del Rosario?

Kun wala nay salig si Noynoy kang del Rosario, nganong iya pa man kining gipasagdan nga makigsabotsabot sa gobyerno sa China?

Isip presidente, kun wala nay salig si Noynoy sa gibuhat sa iyang kalihim, dili lang kay paundangon niya kini og patrabaho sa usa ka misyon, angay niya kining pangayoan sa resignation o taktakon.

Dili nato siya mabasol kun modangop siya og back channel negotiation, apan wala niya mamaayo og plantsa ang pagpa-apil kang Trillanes tungod kay bisan gamay, wala gani kini mokablit kang Enrile aron pahibaw-on sa negosasyon sa luyo.

Niini, walay laing makahilot sa panagbangi tali nilang Enrile ug Trillanes, si Noynoy lamang.

Sumala ra ba sa atong nadunggang impormasyon, ang mga kawani sa Senado hilabihang kasuko ngadto kang Trillanes nganong misukol kini kang Enrile.

Unya, gikuyawan pa ang mga kawani nga basin og mapilde si Trillanes sa sunod eleksiyon tungod sa iyang gibuhat. Apan alang kanako, layo pa ang eleksiyon, basin og mapamatud-an ni Trillanes iyang mga nahimo sa back channel negotiation tali sa China.

* * *

Si Mayor Mike Rama miingon nga si Kongresista Tomas Osmeña nakahimo og “treason” kon paghudas sa iyang mga konstituente sa south district sa dakbayan sa Sugbo tungod sa iyang pag-divert sa P75 milyones nga pundo alang sa iyang distrito ngadto sa unang distrito aron suportahan ang Naga-Carcar road project.

Mibalos usab si Tomas pag-ingon nga walay angay si Mike mo-lecture kaniya sa treason, tungod kay human makadaog si Mike pagka-mayor, nagdumili kini pag-release sa budget ngadto sa mga barangay kang kansang mga opisyal alyado sa Bando Osmeña Pundok Kauswagan (BOPK).

Nakalimot seguro si Tomas nga mao usab kini iyang gibuhat kaniadtong una niyang balik pagka-mayor human makadaog batok kang kanhi Mayor Alvin Garcia. Ang mga barangay officials nga alyado ni Alvin iyang gipapuasa isip balos kay wala molaban kaniya.

Sa makalimot lang!