Ang kampanya sa gobiyerno batok drugas
Nagpakaaron-ingnon lang ang gobiyerno sa iyang kampanya batok sa ginadiling drugas. Gawas niini gigamit lang usab sa mga politiko ang suliran sa drugas alang sa ilang politikanhong mga interest. Mao kini ang hinungdan kun nganong wala gyod magmalampuson ang gobiyerno sa iyang kampanya batok sa nahisgutang suliran.
Sigun sa datos nga giladlad ni Atty. Clarence Paul Oaminal, kanhi vice chairman sa Dangerous Drugs Board o DDB atol sa 9th Founding Anniversary sa New Generation Against Drugs and Corruption o NEWGAD, Inc. kaniadtong Septiyembre 22 sa Southwestern University diin siya ang nahimong mamumulong imong maklaro nga wala gayod seryosoha sa gobiyerno ang kampanya batok sa ginadiling drugas ug gani imong makita nga mas giseryoso pa niini ang kampanya batok sa pagtaas sa populasyon ug ang kampanya sa pagpagamit og condoms.
Basi sa General Appropriations Act of 2012, si Oaminal nagkanayon nga ang Philippine Drug Enforcement Ageny gihatagan lamang og 11.8 milyones ka pesos alang sa iyang drug awareness campaign samtang ang Department of Health gigahinan kini og 800 milyones ka pesos kaniadtong 2011 para sa iyang kampanya sa pagdasig ug pag-ingganyo sa katawhan sa paggamit og artificial family planning method.
Ang Dangerous Drugs Board nga mao ang pinakataas nga policy-making body sa kampanya batok sa ginadiling drugas gigahinan lamang sa gobiyerno og 90 milyones ka pesos samtang ang population commission o popcom nga usa lamang ka attached agency sa Department of Health nga aduna usay laing gahin ang gihatagan og 291 ka milyon ka pesos.
Kun ang gobiyerno makahatag og dako nga gahin nga salapi alang sa kampanya batok sa pagsaka sa gidaghanon sa populasyon sa nasud, nganong dili man siya makagahin og bisan sama na lang ka dako sa gigahin nga salapi sa population commission ug sa Department of Health? Mao ni ang pangutana sa abogado nga si Oaminal.
Karon naghawong na usab ang bugnong lugaynon ug akong napanglantawan nga mosalida na usab ang gobiyerno sa iyang kampanya sa suliran sa ginadiling drugas. Ambot og motuo pa ba kamo sa ilang pagpakaaron-ingnon.
Kay ang gobiyerno nagpakaaron-ingnon lang sa iyang kampanya batok sa ginadiling drugas, angayan na seguro nga kitang mga nagpakabana sa nahisgotang suliran ang mopalig-on ug mopalapad na pagmaayo sa atong kampanya kun ugaling gusto man natong makabaton og luwas nga katilingban gikan sa suliran sa ginadiling drugas.
- Latest
- Trending
