EDITORIAL - Ang mga sidewalk vendors

Ang mga kadagkoan sa gobiyerno ning siyudad sa Sugbo di na makatangtang  sa mga sidewalk vendors   tungod kay daghan kaayong konsiderasyon ang angayang tun-an sa pagbuhat sa ingon.

Una sa tanan nakagamot na sila sa dugay nang panahon pag-angkon sa bahin sa mga sidewalk nga alang unta sa tanan tungod kay wa sila mabadlong sa sinugdanan pa sa ilang pag-ukopar sa maong dapit.

Ang unang mga opisyal ning dakbayan mahimong may buhi pa o kaha patay na ang uban kinsa mao untay angay mubadlong kanila wala makahimo gumikan sa nagsagol nga huna-huna nga mao ang kaluoy ug ang pamolitika.

Nawagtang ang political will gumikan sa kahadlok nga kun papahawaon basin di na mobotar kanila sa adlaw sa election, ug ang maong kinaiya sa maong mga opisyal nasagop sa misunod kanila hangtud nga midaghan ang mga vendors nga di tanan botante sa dakbayan sa Sugbo ug hangtud karon, wa nay gahum ug political will ang tanang mga opisyal sa pagpapahawa sa maong mga vendors.

Busa lifetime na ang maong mga vendors ug ang mga pamunoan ning dakbayan angay unta nga himuong homework ang maayong sistema sa pagpahimutang sa maong mga vendors nga di mahimong eyesore sa ilang nahimutangan.

Kinsa may konsehal nga anaa sa komitiba nga nagsakop sa mga vendors sa Colon ug uban pang mga kadalanan ning siyudad, angay untang sulsolan sa ilang mga anak o asawa nga himuong homework nila ang paghimo og sistema aron hapsay tan-awon ang mga sidewalk vendors.

Kay lahi ang Carbon market kay sa Colon ug uban pang kadalanan. Kun sa Carbon nagkamuritsing lang ang pagkabutang sa mga vendors, diha sa atong mga sidewalk nga maoy sentro o frontline ug show window sa atong dakbayan di lamang sa taga ato kundi sa tanang dumuduong, mas labing maayo nga himuon ang katahom, hapsay ug kaanindot nilang tan-awon.

Kun kinsa mang konsehala ang anaa sa maong komite nga nagsakop sa mga sidewalk vendors, please, your honor yak-i sa makadiyot ang mga vendors nga anaa sa dalan Pelaez atubangan o kilid ba kana sa USC ug kadtong tua sa Ramos market o kaha kadtong tua dapit sa Banilad ug palihug palihoka ang inyong utok kalabot niining butanga.