Dili na kahadlokan

Kaniadtong Biyernes, gihinumdom ang ika-40 nga kasumaran sa pagdeklara sa martial law dinhi sa Pilipinas. Kabahin na sa atong kasaysayan ang maong puthaw nga rehimeng Marcos, kinsa miguyod sa nasud ngadto sa mangiub nga lasang sa dektadorya.

Dinhi sa Sugbo, ato na usab nga gisaulog nga tinuig nga Cebu Press Freedom Week. Daghan sa mga programa ang gihan-ay atol sa maong kasaulogan nga nagtumong usab sa pagpalambo sa propesyon sa medya.  

Kining maong tulomanon naghatag og importansiya sa kagawasan sa mamamahayag ilalum sa demokrasyang klase sa pangagamhanan. Bitaw dako og papel ang gikuptan sa medya alang sa pagpatunhay sa atong kagawasan, ilabina dinhi sa Pilipinas nga maoy nagdala sa lampara sa demokrasya niining dapita sa kalibotan.

Karon, 26 ka tuig na kitang nahibalik sa atong pagkagawasnon. Gani, tungod niini, dako na kita og nakab-ot mahitungod sa pagpalambo sa atong nasud, ilabina sa aspeto sa demokrasya ug ekonomiya.

Apan pipila ka dekada human mahibalik ang demokrasya sa nasud, nakabaton na ba kita og tinuoray’ng kagawasan? Unsa ang leksiyon nga atong nakab-ot gikan niadtong maong mangiub nga panahon.

 Ang dakong leksiyon mao nga dili na gayud kita magpalupig pa batok niadtong buot nga moyatak sa atong kagawasan. Hinuon daghan pa ang nagtinguha pagpanglupig sa atong katungod, ilabina niadtong mga anaa sa gahum.

Gani ang mga Marcos hayahay nga misulbong ngadto sa ilang paghibalik sa gahum. Halos tanan kanila nagkupot karon og importanteng posisyon sa nasud. Si Senador Juan Ponce Enrile, ang usa sa mga arkitekto sa martial law, pabilin pa gihapong usa sa maabtikon ug tang-an sa politika.

Apan wala kini nagpasabot nga kaya gihapon niadtong nagpasiugda sa martial law kaniadto nga mohimo og milagro. Nakaamgo na kita. Andam na kitang makigbatok niini aron pagprotehir sa atong kagawasan.

Subra na sa duha ka dekada sa paghibalik sa demokrasya sa nasud, ug ania kita karon nagpauraray sa sulog ngadto sa tumang kalamboan. Dili na kahadlukan ang unsa man lakang pagtumba na usab sa atong kagawasan tungod kay anad na kitang makigbatok niini.