Katin-awan sa isyu

Sa tanang mga reporters sa City Hall ako ra ang mituki niining isyu nga naglambigit sa pagpalit og yuta sa kagamhanan sa dakbayan nga anaa mahimutang kilid sa Fort San Pedro.

Gusto lang masabtan pag-ayo kining maong isyu kay adunay ubang magsisibya nga migamit sa akong balita aron pagdiskutir niini sa ilang programa sa radyo, apan dili tukma.

Una sa tanan, kining yuta nga nahimutang kilid ug luyo nga bahin sa karaang Fort San Pedro gipanag-iya sa pamilya ni Amelita Sola.

Kay misimpig man gayud sa kilid sa Fort San Pedro ang yuta ni Sola, gusto ni Mayor Mike Rama nga paliton sa dakbayan ang dos metros gikan sa pader aron himuong “jogging lane.”

Sigun sa pagsukod, 87 metro-kwadrado nga yuta ni Sola ang magamit alang sa paghimo og jogging lane. Gipresyohan ni og tag P8,000 sa City Appraisal Team, apan sa ngadto-ngadto giusab ug gihimong P15,000 matag metro-kwadrado.

Si Mayor Rama misuwat ni Sola ug mihangyo nga bisan dili pa mabayran sa dakbayan ang maong yuta, sugdan na lang ang paghimo’g jogging lane, unya ang kabahin sa balay nga maguba, ang mga panday sa City Hall ang moayo niini.

Dia dinhi ang isyu. Gibiyaan sa mga panday nga wala pa maayo nila ang naguba nga bahin sa balay ni Sola. Ikaduha, wala pa gihapon kabayri sa City Hall sola sa iyang yuta.

Dunay mga magsisibya nga nagsigi og tagawtaw kay kuno si Sola nagpagamit sa politika. Nakadungog usab ko og kumentaryo gikan sa usa ka tigpaminaw sa radyo nga mihimo’g sayop nga pamahayag.

Si Konsehal Margot Osmeña kuno maoy nagbabag nga mabayran si Sola. Kay kining maong isyu nabutyag man sa publiko pinaagi sa akong balita nga gihimoan og sayop nga interpretasyon, nahukman nako nga hatagan kini og tukma nga pagpasabot.

Wala babagi ni Rama ang tinguha ni Rama nga paliton ang yuta ni Sola. Apan isip pangulo sa City Council’s committee on budget and finance, iyang trabaho ang pagtan-aw nga tukma ang mga papeles sa maong transaksyon.

Si Konsehal Jose Daluz III misugyot nga tugotan sa konseho sa dakbayan si Mayor Rama aron makigpirmahay og kasabutan ni Sola sa pagpalit sa yuta sa kantidad nga P2,039,500.

Nahibulong si Konsehal Osmeña kay ang appraisal document nga gisumiter sa konseho isip supporting documents ni Konsehal Daluz, tag P8,000 ra kantidad sa yuta.

Ang presyo nga tag P15,000 matag metro-kwadrado nga maoy ikaduha nga pag-appraise sa City Appraisal Committee, dili si Daluz ang naghatag niini kun dili si Sola.

Apan bisan pa’g kwentahon nimo sa tag P15,000 ang matag metro-kwadrado, dili usab makaabut og P2,039,500 ang mabayran. Mao kini ang rason nga wala pa moaprobar si Margot sa maong transaksyon.