Ang kampanya batok ginadiling drugas

Nagtamod gyod kaha sa ilang trabaho ang mga gitahasan sa pagsumpo sa ginadiling drugas sama sa Philippine Drug Enforcement Agency or PDEA ug ubang mga ahensiya sa gobyerno? Ganahan gyod kaha ang atong mga opisyal sa nasud, lalawigan, dakbayan, lungsod ug barangay nga mawagtang ang suliran sa ginadiling drugas? Kini ang atong mapangutana tungod kay hangtod karon luya man gihapon sila sa pagsumpo sa nahisgotang suliran.

Ang PDEA nga atong gisaligan sa pagsumpo sa suliran lahi ang gitutokan. Mas giuna pa nila ang bangi sa ilang kadagkoan kay sa paggukod sa mga tigpayuhotan og ginadiling drugas. Mas giuna pa nila ang pagpaburot sa ilang mga bulsa kay sa pagluwas sa mga mamahimong biktima sa drugas. Mas giuna pa nila ang pagpanalipod sa mga kakompetinsiya sa negosyong illegal sa ilang mga amo ug padrino kay sa katawhang peligrong mahitumpawak sa kaalautan.

Ang kabarangayan usab nga dapat maoy mag-una sa kampanya batok sa ginadiling drugas nagpalingog-lingog lang ug wala gani makaporma sa ilang mga Barangay Anti Drug Council o BADAC nga gisita gayod sa Local Government Code. Anaa untay agrisibo kaayo nga nangampanya sa ginadiling drugas sa barangay Mactan sa Lapu-Lapu pero wala gihapoy pulos tungod kay ibasura ra ang kasong ipasaka batok sa ilang mga dinakpan kay manglaktod. Aduna poy mga kapitan sa barangay nga nagpabadlong tungod kay sila mismo ang adik ug nagpayuhot og ginadiling drugas.

Ang mga polis nga nakadakop sa mga tigpayuhotan og ginadiling drugas dili upod manunga sa adlaw sa bista sa kaso hinungdan nga ang mga kasong naglambigit sa ginadiling drugas gipangbasura sa hukmanan. Unsa man sige pa ta ning atong krusada.

* * *

Ako diay nga pahalipayan ang New Generation Against Drug and Corruption (NEWGAD, Inc.) kay anaa na siya sa iyang ika-siyam (9) ka tuig nga adbokasiya sa pagpakigbatok sa ginadiling drugas ug corruption. Ning maong pangidaron taas na siya og naabtan sa pagpalapad ug pagpadako sa iyang krusada. Hinaut pa unta nga magpabilin ug magpadayon siya sa iyang tingoha nga makabaton og usa ka drug ug corruption free nga katilingban ug sosyedad. Hinaut pa usab unta nga ang mga mituo sa iyang krusada magpadayon sa ilang pagsuporta ma moral man o financial. Sa NEWGAD, Inc. ug mga sakop, kongratulations ug ipadayon ang imong pagpakigbisog.  

Gipasakaan niadtong miaging adlaw og kaso sa buhatan sa Ombudsman si kanhi mayor ug karon Kongresista Tomas Osmeña tungod sa duha ka controversial nga sakyanang gigamit sa kongresista. Duha ka kasong kriminal ang gipasaka batok sa kongresista ug kini mao ang kalapasan sa anti-graft law ug code of conduct of government officials and employees.