Politika init na kayo

Mibukal na gayud pag-ayo ang “kaldero sa politika” dinhi sa dakbayan sa Sugbo. Gipasakaan kagahapon og kaso ni Mayor Michael Rama si Kongresista Tomas Osmeña didto sa Office of the Ombudsman-Visayas.

Gipasanginlan ni Rama si Tommy nga nakalapas sa lagda nga gilatid sa Republic Act 6713, (Code of Conduct and Ethical Standards for Public Officials and Employees) ug sa balaud nga gilatid sa Revised Penal Code.

Miinsistir g’yud si Rama nga ang duha ka Dodge Charger nga sakyanan nga iya sa Bigfoot Entertainment gihatag gayud kang Tommy ug dili tinuod nga gipalit kini sa maguwang niini nga si Ma. Victoria “Minnie” Osmeña. Ang record nagpakita nga ang maong mga sakyanan napalit ni Minnie gikan kang Michael Gleissner nga maoy tag-iya sa Bigfoot Entertainment.

Tinuod, suod kaayo sila nga managhigala si Tommy ug Gleissner kay ang maong German national gitabangan man ni Tommy sa pagkuha og usa ka mahinungdanong dukomento sa Department of Foreign Affairs.      Ang duha ka US-made Dodge Charger nga sakyanan, idonar unta ni Gleissner sa City Hall apan pagkasayud ni Gleissner nga ang termino ni Tommy kutob ra niadtong Hunyo 30, 2010, gitanyag na lang niya nga ihatag kini direkta kang Tommy.

Bright si Tommy kay wala dawata. Ang balaud gud naglatid man nga atul sa imong katungdanan sa kagamhanan dili ka gayud makadawat “direkta o indirekta” og mga mahalong gasa, bisan og human na sa iyang termino basta nasulod sa usa ka tuig.

Si Minnie kuno ang mipalit sa maong mga sakyanan apan gipagamit lang ni Tommy. Kini maoy angay’ng probahon ni Rama kun tinuod ba nga wala kini palita ni Minnie. Buyno, sa ako na nga giingon sa miaging mga adlaw, ang pagbutang og blinker ug siren sa sakyanan, ilabi na nga gipintalan ni nga sama gayud sa sakyanan sa kapolisan, anaa diha ang isyu. Apan sayud ko nga tubagon kini ni Tommy.

Bahala na ang Ombudsman nga motimbang-timbang sa pasangil ni Rama ingon man sa mga tubag ni Tommy.

Karong gipasakaan ni Rama og kaso si Tommy, mora’g nalantawan nako nga sa dili madugay, mubawos si Tommy og pasaka’g kaso batok ni Rama. Angay’ng magmatngon karon sa iyang mga lihok si Rama kay sigurado nga ang iyang mga kontra sa politika magpaniid na kaniya.

Mao kini ang nakaayo kun ang atong mga politiko dili managkauban sa usa ka partido. Kun kauban sila sa partido, piyong-piyongan ra man nila kun dunay isyu nga angay’ng kwestyunon. Tan-awa, bisan sa mga opisyal sa Kapitolyo ingon usab niini ang ilang gihimo.

Kaniadto nga kauban sila sa partido, daw mga buta ug bungol sila apan diha nga mibuwag na sila sa ilang grupo, misugod dayon sa pagkwestyon sa pipila nila ka proyekto kaniadto. Mao kana’y gitawag og mga tawo nga walay baruganan.

Kun gihimo pa unta ninyo ang pagkwestyon sa maong isyu nga kauban pa kamo sa grupo kaniadto, mosaludo g’yud ko ninyo.

* * *

Bisi kaayo kaming mga sakop sa media niining semanaha kay gisaulog namo ang Press Freedom Week ug kami sa radyo ug TV, nagsaulog pa gayud sa Broadcasters Month.

Sa pagsuwat nako niini, (kagahapon) nagtambong ko sa annual general membership meeting sa Cebu Federation of Broadcast Journalist (CFBJ). Unya karong Sabado, culmination sa Press Freedom Week ug daghang gihan-ay na nga kalingawan. Tiaw mo nga ang matag grupo sa media sa lainlaing news beats, mag-indigay sa balak, hara ug balitaw. Pwerteng lisura g’yud.