EDITORYAL - Ang Cebuano Catholic Bible

Suwerte kaayo ang mga Katoliko kay may Biblia nga gihubad sa Cebuano nga kinutlo gikan gayud sa orihinal nga version sa Biblia nga gitagik sa pinilungang Griego ug tawgon nga Cebuano Catholic Bible.

Gibutyag ni Padre Carmelo Diola nga gituyo kini paghimo sa mga eskolar nga Katoliko aron masabtan gayud sa tanan ilabi na sa mga Katoliko kun unsa katin-aw ang mga pulong ug balaod sa Dios nga anaa sa Biblia.

Usa sa tuyo ni Padre Diola, nga basahon gayud kining libroha sa mga Katoliko ug sa tanang tawo ilabi na sa mga Sugboanon tungod kay mas sayon sabton ang mga unod niini kay sa Biblia nga hinubad sa English, Tagalog, Ilonggo ug uban pa.

Apan angay masayran sa tanan nga ang pagbasa sa Biblia di sama sa Komiks nga may sinugdanan ug may katapusan usab.

Kay ang pagbasa sa Biblia sama sa magkutlo ka og balaod kun ikaw usa ka abogado o kaha huwes aron imong ipalig-on ug isuporta sa matang sa kaso nga imong gikuptan.

Sa mga balaod nga imong gikutlo gikan sa libro sa Batakang Balaod o Konstitusyon   nga maoy silbi nimong Biblia ug uban pang mga referensya kansang mga gisulat nga impormasyon mosakar  sa imong gikinahanglan nga kamatuoran nga haom sa gi-establisar nimong isyu, ingon niana ang imong paggamit sa Biblia.

Buot ipasabot nga bisan unsa katin-aw sa mga pulong nga Sinugboanon sa imong Biblia kun di ka kaantigo mogamit niini ma-wa gihapon ang kapuslanan sa maong basahon.

Ang Biblia maoy motudlo sa tawo sa kaluwasan sa adlaw sa paghukom, busa kun ang imong isyu o pangutana asa mabasa sa Biblia nga maluwas ka isip Katoliko, mao nay angay nimong pamuwawan  sa pagpangita sa mga sitas o kapitolo ug bersikulo sa Biblia nga motubag sa imong pangutana.

Kun di ka makapag niini sa Cebuano Catholic Bible angay ka nga magpakitambag sa mga suhito sa Biblia.