Sulbad sa teknolohiya

Alcuino, masulbad sa bag-ong mga teknolohiya ang nag-unang mga suliran sa Sugbo ug sa nasud. Pero ang problema mao ang pagdumili sa mga opisyal sa gobyerno paggakos nila. Maong bisan kapila na napakyas ang naandan nga mga sulbad, gibalikbalik lang gihapon uban ang way sukaranang paglaom nga lahi ang resulta.

Gidapit nako si Alcuino, nga nadestino sa Knowledge Management Division sa National Economic and Development Authority sa Central Visayas, sa “Arangkada” sa DYAB. Kay bilib ko sa iyang kasuhito sa nagkalainlaing natad sa teknolohiya dihang niboluntaryo sa Grand Halad sa Kapamilya sa Cebu Normal University (CNU) niadtong Hunyo.

* * *

Nisugyot si Alcuino pagsulbad sa way kinutoban nga linya sa mga kliyente sa National Statistics Office, Social Security System, Department of Foreign Affairs, Professional Regulation Commission, National Bureau of Investigation ug ubang mga buhatan sa gobyerno pinaagi sa teknolohiya sa short messaging system (SMS).

Inay mangadlawon og linya, ang magbubuhis mo-text sa code sa serbisyo nga iyang gikinahanglan sa hingtungdan nga buhatan sa gobyerno, kansang server gi-program na paghatag niya og automated nga tubag nga maglakip sa iyang priority number o sa oras ug petsa kanus-a siya kinahanglang mopakita sa linawas aron maatiman ang iyang transaksiyon.

* * *

Nipasabot si Alcuino nga ang Android phones, nga maoy labing barato karong smart phones sa merkado, mahimong gamiton pagpangita sa labing laktod nga agianan sa tubig sa mga dapit sa Metro Cebu nga kanunay’ng bahaan kay sa mas habog nga bahin ang mga lutsanan.

Matud ni Alcuino daghang libre nga Android applications ang magamit pagkuha og tukmang sukod sa gihabugon sa mga agianan sa baha ug paghimo og 3D nga mga mapa nga mogiya sa mga inhinyero sa local government units unsa ang labing tukma nga drainage system ang gikinahanglan.

* * *

Nitanyag pa gani si Alcuino paghimo og Android apps nga mosulbad sa dugay na namong proyekto—apan wa pa mi kahibawo unsaon pagpatuman—ang pag-abot sa mga drayber ug mga pasahero sa taxi sa labing dali nga panahon ug sa labing sayo ug luwas nga paagi. Android tablet ray gikinahanglan, nga magsilbing server sa DYAB booth, ug baratuhong Android phones sa mga drayber ug mga pasahero nga narehistro sa among database. Kun mo-text ang pasahero sa code sa pagpangita og taxi, ang server mopasa sa mensahe ngadto sa labing duol nga taxi driver, kinsa makatultol dayon sa pasahero. Akong gipahinumdoman si Alcuino sa pasidaan sa katiguwangan nga kun ang pagbuhat sama pa kasayon sa pagsulti, ang tanang payag kastilyo na karon. Nisumbalik siya nga, lahi sa mga sangkap sa payag ug kastilyo nga mahurot, ang kinaadman sa bag-ong mga teknolohiya way laing kapaingnan gawas sa paglambo.

* * *

Email: [email protected]