Daghan ang nag-ingon nga ang paghitak sa ilegal nga drugas, ilegal nga sugal nga sama sa tigbakay, tong its, video karera machine, masiao sa swertres ug masiao sa Jai Alai mahimo lamang molungtad kun ang mga lokal opisyal ug kapolisan dili lamang magpakabana sa pagsumpo.
Nagkinahanglan hinuon kini og suporta sa mga barangay opisyal ug mga molupyo sa kabarangayan aron gayod magmalampuson ang kapolisan sa ilang kampanya sa pagsumpo sa mga ilegal nga kalihukan.
Dugang pa nila nga ang mga polis moingon nga dako kaayo og ikatabang ang mga barangay opisyal ug mga molupyo sa ilang kampanya sa pagsumpo sa ilegal nga kalihokan.
Giangkon sa kapolisan nga lisod kaayo alang kanila nga mga polis ang paghimo og mga lakang sa pagsumpo kun ang mga barangay opisyal ug mga molupyo dili lamang magpakabana sa mga panghitabo sa ilang palibot. Gitataw sa mga polis nga ang mga barangay opisyal ug mga molupyo sa kabarangayan maoy labing unang nasayod sa ilang mga silingan nga nalambigit sa ilegal nga kalihukan maoy hinungdan nga gidasig kini nila sa pagtaho ngadto sa ilang buhatan.
Adunay mga higayon nga kun ang kapitan dili lamang magpakabana sa naghitak nga ilegal nga kalihokan sa iyang barangay motumaw usab ang katahap nga lakip kini sa nalambigit ug angay lamang nga magpakabana ang mga molupyo.
Apan subo lamang nga palandungon kun ang mga polis dili lamang usab magpakabana sa paghimo og lakang sa gipadangat nga mga taho sa mga molupyo nga makapatumaw na hinuon sa katahap sa ilang kalambigitan sa mga ilegal nga kalihukan sa ilang dapit.
Matud pa nila nga sa maong kahimtang maoy bugtong mahimo sa mga molupyo sa pagtak-om na lamang sa ilang baba taliwala sa mga nakuha nga kasayuran sa naglihok nga ilegal nga kalihukan sa ilang dapit sa paglikay nga luyo sa ilang pagpakabana mao na hinuon ang masugamak sa kahasol ug kasamok sa ilang pagpuyo. (Romeo T. Limpangog)