Sayo'ng pangampanya

Sunod tuig pa ang eleksiyon ug wala pa gani magsugod ang kampanya apan ang palibot sa dakbayan naputos na sa mga propaganda materials sa mga politiko'ng way uwaw.

Ang Commission on Elections mitakda sa filing sa certificate of candidacy karon pang sunod buwan apan dugay rang nagsugod ang kampanya dinhi sa dakbayan.

Nasaksihan na sa katawhan ang halos matag gabii nga pulong-pulong ug matag buntag nga pagpanglamano sa mga nagtinguha pagpapili sa mosunod nga piniliay.

Maisip man nga sayong pagpangampanya apan inutil ang Comelec pagsanta nila.

Kini tungod kay dili paman sila maisip nga kandidato hangtud nga makaduso sila sa ilang CoC.

Ang mga pulong-pulong ug pagpanglamano mamahimong palabyon apan ang pagpapilit na og mga propaganda materials sama sa dagko kaayo nga mga pangalan sa mga buot mopapili usa ka klaro na kaayo nga pagpanginsulto sa balaud.

Dili lang sayo nga pagpangampanya ang ilang gihimo kun dili paghugaw-hugaw sa atong dakbayan.

Pipila sa mga tawo nga guilty niini mao ang usa ka konsehal ug kanhi konsehal sa siyudad sa Sugbo.

Ambot unsay naa sa ilang pangalan nga nagkapareho man gyud silang duha nga way respeto sa atong balaud.

Dili nalang sa lagda sa Comelec kun dili ang paghugaw-hugaw sa atong palibot. Ang kinaiya sa mga politiko nga sama nilang mga bintahoso way luna sa tarong ug ligdong nga pangagamhanan.

Si Mayor Mike Rama miagni sa katawhan nga moapil sa pagpanglangkat sa mga propaganda materials.

Nganong dili man niya gamiton ang iyang gahom paggukod niining mga tawhana? Nganong magpalaban man siya sa publiko?

Ang tinuod wala man sab gud siya’y nawong nga makapanulisok niining mga tawhana kay kun buot huna-hunaon labaw pa siya niining mga tawhana.

Kini tungod kay ang pamolitika ni Rama kwarta sa mga magbubuhis ang iyang gigamit.

Pananglitan, ang iyang pagpanuborno sa mga kapitan og mga brand new nga sakyanan. Kinsa mang kwarta gigamit, dili ba kwarta sa mga magbubuhis?

Bisan unsaon niya og ingon nga para sa barangay ang maong mga sakyanan, apan ang kamatuoran mao nga way bisan usa ka yanong molupyo sa barangay ang makagamit niini.

Ang tinuod mao nga ang kapitan lang ug ang pipila ka konsehal nga gitugyanan sa maong mga sakyanan maoy mogamit niini. Angkunon man niya o dili apan tataw nga ang maong mga sakyanan gitumong ni pagsiguro nga magpabiling loyal niya ang mga kapitan ug konsehal nga nakadawat niini.

Inay ipalit og truck sa basura alang sa kabarangayan nga mapahimuslan sa tanan gipanuborno hinuon sa mga kapitan ug konsehal.

* * *

[email protected]