Saludo ko ninyo

Yukboan nako ang mga traffic enforcers sa Cebu City Traffic Operations Management (CITOM) nga gipasidunggan kagahapon didto sa City Hall tungod sa paghimo nila og trabaho nga maisip na nga “extra service.”

Bisan og wala sila’y armas apan wala kini makapatalaw sa maong mga traffic enforcers nga gukdon nila ang mga snatchers ug tulisan nga armado pa gani og .38 kalibre nga revolver.

Husto kaayo ang gihimo nila ni CITOM Executive Officer Rafael Christopher Yap ug ni Executive Assistant Joy Tumulak nga hatagan og pasidungog ang maong mga traffic enforcers. Si Mayor Michael Rama ang mitunol sa ilang pasidungog atul sa yanong kalihukan sa City Hall kagahapon. Daku nako nga pagyukbo kanila ni Traffic enforcers Enrico Silagan, Pete Colina ug PO2 Adrian Cagalitan kay sila maoy nagtinabangay nga madakpan ang usa ka snatcher nga nasakmitan nila’g revolver.

Sila si Traffic Enforcer Ivan delos Santos , Glenn Gatoc ug Ervic Navarro midakup gihapon og hold-upper nga armado og revolver. Nabawi pa gayud nila ang itum nga wallet sa biktima nga may sulod nga P1,500.

Unya si Traffic Enforcer Mark Anthony Melendres midakup usab og usa ka snatcher ug nabawi niya ang areyos nga nalabni sa suspetsado gikan sa biktima.

Sila si Traffic Enforcers Julito Baldago ug Adonis Café midakup usab og duha ka snatchers nga mibiktima og pasahero sa usa ka PUJ.

Laing mga traffic enforcers nga midakup og snatchers human kini makabiktima diha sa Colon mao sila si Mario Reyes, Cronnie Cabatingan ug Marwin Igoy. Ang ilang mga nadakpan gipasakaan na og kaso sa fiskaliya. Usbon nako, akong yukboan ang mga ingon niini nga matang sa traffic enforcers.

* * *

Apan samtang yukboan nako ang mga nagbinuotan ug kugihan nga mga traffic enforcers, sawayon nako ang binuhatan niadtong mga traffic enforcers nga kusog kaayo nga mangilkil sa madakpan nila nga draybers.

Unya, dili gayud mawala ang pagka dili disiplinado sa ubang traffic enforcers. Ingon niini ang sitwasyon. Giawhag ni Rama ang tanang enforcers nga adto maglinya sa iyang atubangan.

Tuod, naglinya ang mga traffic enforcers sa atubangan sa mayor. Apan sa hinapos na nga bahin sa pagdiskurso ni Rama, nakabantay siya nga adunay usa nga didto ra nagpahipi sa sakyanan sa unahan.

Kay gi-call man ang atensyon sa maong enforcer, napugos kini paggawas. Pastilan, dili diay kay usa ra, tulo gayud diay sila ka traffic enforcers nga igo lang mitago didto sa sakyanan ug wala mouban sa ilang mga kauban nga didto nagbarug sa atubangan.

Alang kanako, angay silotan kadtong tulo ka traffic enforcers.

* * *

Nagsultihanay mi Atty. Yap nga maoy executive officer sa CITOM ug among gihisgutan kun unsa kaha ang makapausab sa mga traffic enforcer nga dili na sila magtinapolan ug labaw sa tanan dili na mangilkil.

Akong giingnan si Yap nga kinahanglang mga traffic enforcers maoy magsilbi nga ehemplo, dili kay maoy mag-una-una nga mosupak sa balaud nga sila ang gitugyanan sa pagpatuman.

 Apan kinsa may morespeto sa CITOM nga makaako ra man sila nga magdagan ang ilang sakyanan nga dili kompleto ang suga, unya ang ubang traffic enforcers dili motuman sa tukmang lagda sa pagmaneho’g sakyanan?

Suheto ko niini kay deputized agent ko sa Land Transportation Office (LTO). Pagbaton usab mo og kaikog uy.