Mga Katoliko kuno sila

Usa ka pundok sa mga Katoliko ang mapasigarbohon kaayong nagpahibawo nga lunod- patay silang mga Katoliko. Diehard sila nga mga Katoliko apan, supak sila sa pipila ka pagtulon-an sa Simbahan.

Sa ato pa, magpabilin silang Katoliko, apan, at the same time, dili sila motuman sa mga teachings sa Catholicism, sama sa gibarugan karon sa Simbahan pagsupak sa RH Bill. Alang kanila, sayop ang Simbahan niining tungora, ug sila ang husto. 

Kun mao kini ang ilang gibarugan, waa na tay mahimo ini. Dili nato sila mapugos. Ang Simbahan dili makapugos kanila pagsagop sa baruganan sa Simbahan. Kay dili man usab nato sila mapugos pagpatuo sa atong gituhoan. Mag-iyahay na lang ta ini.

Unya, pagpakita sa ilang kaisog pagsupak sa teaching sa Catholic Church, mangampanya na usab sila paghipos og one million signatures pag-uyon sa RH Bill ug pagsupak sa Simbahan. 

Walay mopugong kanila … makapatuyang sila sa ilang gibati. Hinumdoman nga bisan si Jesus mismo wala mamugos kang bisan kinsa pagkuyog ug pagtoo Kaniya. Sa ilang pagduaw sa usa ka dapit nga wala mo-welcome kanila, Iyang giingnan ang iyang mga Apostoles nga sige lang, adto ta sa sunod nga lungsod, basin pag dawaton ta didto.

Ang baruganan ug ang mga teachings sa Simbahan wala i-imposed, wala ipugos kang bisan kinsa. Maoy hinungdan nga niining isyo sa RH Bill, ang mga Katoliko, sama niining mitawag sa ilang kaugalingon nga mga Catholics for RH Bill, wala kini sila did-i sa Simbahan paghimo’g mga lakang batok sa Simbahan.

Alang nako, mahimo man gani nga ila nang i-renounce ang ilang pagka-Katoliko, aron mahingpit gyud ang ilang pagka-Anti-Catholic ug magmugna silag mga pagtulon-an nga mas husto kay sa mga pagtulon-an nga gitudlo sa Catholic Church.

Ang Simbahan igo lang nga nagpahinumdom ug nagpasidaan nga ang RH Bill supak sa mga pagtulon-an sa Simbahan. Akong usbon, wala kini ipugos kanila. Ang tanan adunay hingpit nga kagawasan pagsupak niini, sama sa mga Catholics (konohay) for RH Bill.

Kun duna silay kaugalingon nga pagtulon-an nga sukwahi sa mga pagtulon-an sa Simbahan, ug kun sa ilang pagtuo, sila ang husto … nan, waa na tay mahimo ini. Ug congratulations nga napalgan ra gyud nila ang Kamatuoran. Nga sila diay ang naghupot sa Kamatuoran, dili ang Simbahan.

Aron nindot paminawon, ang RH Bill ila kining ginganlan karon og Responsible Parenthood, Reproductive Health and Population and Development Act of 2011. Nindot tuod paminawon. Unya, ingon dayon sila nga dili kini abortion, dili population control, dili pag-promote sa kahilayan sa lawas.

Igo lang kono silang mamalit og condom ug mga contraceptives aron ipang-apud-apod sa matag Pilipino, labina sa mga batan-on .. for free. Kay pinaagi kono sa mga condom mahimo nang Responsible ang mga Parents.

Ingon usab sila nga hatagan unta og free choice ang magtiayon kun pilay ilang ianak ug unsaon nila pagpanganak. Free choice man kaha, nganong magkinahanglan man tag balaud nga maoy magbuot unsaon pag-exercise ang free choice?