Di sa pagarpar lang

Katabangan ni Cebu City Mayor Mike Rama ang imbestigasyon sa Visayas Ombudsman ug sa Department of the Interior and Local Government (DILG) sa kontrobersiya sa duha ka luhong sakyanan nga gimarkahan ni Kongresista Tommy Osmeña og “Police” ug sa logo sa Dakbayan sa Sugbo. Kun mohunong siya og tabi, bisan kadiyot lang, aron pag-utingkay sa mga dokumento sa iyang buhatan.

Kay kun tinuod ang pagduda nga ang City Hall, di si Minnie Osmeña, ang gihatagan sa mga sakyanan, dako ang kahigayonan nga ang dokumento sa donasyon naa sa buhatan ni Rama. Wa sa buhatan ni Visayas Ombudsman Pelagio Apostol. Ni sa buhatan ni DILG 7 Director Ananias Villacorta.

* * *

Maong di angay’ng mag-apura si Rama sa Ombudsman ug sa DILG. Siya ang labing takos nga makatukas sa misteryo sa duha ka sakyanan sa kinaham nga negosyante ni Osmeña nga si Michael Gleissner.

Apan di ni niya mahimo pinaagi sa way kinutoban nga mga diskurso. Ni sa tag-as kaayong mga tubag sa iyang mga press conference. Kun dili sa pag-ila-ila sa mga dokumento nga nagtipun-og sa iyang buhatan. Bisan way makit-an nga deed of donation, makaseguro si Rama nga di na malutsan sa sunod nga mga dokumento nga iyang pirmahan.

* * *

Sa pikas nga bahin, angay sang ipakita na ni Osmeña ang mga dokumento nga magmatuod sa giingon niyang pagbaligya ni Gleissner sa mga sakyanan ngadto sa iyang maguwang. Mas mapuslanon ang mga dokumento kay sa pagsige niya og panghagit nilang Rama ug uban niyang mga kaatbang sa pagkiha niya.

Lisod tuohan nga way dokumento ang transaksiyon nilang Gleissner ug Minnie.Pulos sila beterano sa dagkong mga transaksiyon aron nga mokalit lang og likoy ug mosud og inato nga sabutsabot. Gawas lang kun si Kongresista Osmeña ra ang nahibawo nga ang mga sakyanan di bayad sa mga pabor nga iyang nahatag ni Gleissner.

* * *

Sa laktod, mas makasabot ang Sugbuanon nga mga magbubuhis unsay giawayan nilang Rama ug Osmeña kun menosan ang ilang pagarpar ug kinawrasay. Ug dugangan ang ilang mga paningkamot pagmatuod sa mga pasangil batok sa usa’g-usa.

Sa pikas nga bahin, hinaot nga ang mga reporter nga nag-cover sa City Hall ug ubang nalingaw kaayo nga mga sakop sa media mohunong na paghimo sa ilang kaugalingon nga mga morang nangiyugpos nga mga tigtan-aw lang. Nga igo lang maminaw, magyanguyango ug motaho sa nag-alintabo nga binayloay sa hait nga mga pung sa mga protagonista sa nagka-personalay na nga away. Ug mosugod na pagsusi, pinaagi sa pagpaningil og mga ebidensiya, kinsa nilang Rama ug Osmeña ang nagtinarong. O nanglawgaw ug nagpataka lang.

* * *

Email: [email protected]