Kabalaka nga mawad-an og trabaho

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Daghan ang gibati og kabalaka nga mawad-an sa ilang trabaho sa higayon nga hingpit na nga ipatuman ang pagbalhin sa licensing center sa Land Transportation Office (LTO) 7 sa barangay Looc, dakbayan sa Mandaue ngadto na sa giplano nga lugar sa J. Mall Center sa dalan A.S. Fortuna sa barangay Bakilid sa maong dakbayan.

Si Dr. Danilo Dionson nga nanag-iya og drug testing center nga nahimutang atbang nga bahin sa LTO sa maong dakbayan maoy usa lamang sa mga maapektohan nga mipadayag sa ilang kabalaka. Matud pa niya nga unom sila nga nagpadagan og drug testing sa kasamtangan karon nga nahimutangan sa licensing center sa LTO sa barangay Looc sa maong dakbayan.

Dugang pa niya nga sa unom nilang nagpadagan og drug testing sa maong dapit maoy maapektohan ang lima kanila kay ang usa nga gipanag-iya sa usa ka babaye mao man ang makapabor kay mahiuban sa pagbalhin ngadto sa bag-ong lugar nga pagabalhinan. Gipasabot ni Dr. Dionson nga nangayo sila og katin-awan sa plano sa maong pagbalhin sa licensing center sa LTO sa dakbayan sa Mandaue.

Si Dr. Dionson miingon nga nakapatingala kaayo nila ang tinguha nga pagbalhin sa licensing center sa LTO sa dakbayan tungod kay sa kasamtangan karon nga nahimutangan wala man kini mag-abang kay ang luna gipanag-iya sa lokal nga kagamhanan ug ang building nga nahimutangan gipatukod man sa rehiyonal nga buhatan. Gipadayag ni Dionson ang mao nilang reklamo nga nagpadagan og drug testing alang sa mokuha og lisensiya alang sa pagmaneho og sakyanan kay makahatag man kini og dakong epekto ngadto kanila.

Si Dr. Dionson miingon nga gipadangat niya ang mao nilang reklamo sa buhatan ni LTO 7 Raul Aguilus ug gipadala usab niya ang kopya sa mao niyang reklamo ngadto sa buhatan sa Ombudsman Visayas, Civil Service Commission, sa buhatan ni kanhi DOTC Secretary Mar Roxas ug Presidente Noynoy Aquino.