2013 Budget

Maayo baya ang gihimo ni Mayor Michael Rama nga gipaapil niya ang mga representante sa lainlaing sektor sa katilingban sa pag-ila kun unsa ang mga proyekto nga angayang hatagan og unang pagtagad sa budget karong sunod tuig.

Ang mga sektor nga akong giingon naglakip sa mga opisyal sa barangay, senior citizens, professional, mga opisyal sa tunghaan, drayber og habal-habal ug daghan pa.

Gibahin sila og upat ka grupo ug giawhag sa pag-ila kun unsa ang mga problema sa ilang dapit, dayon giawhag sila nga mohatag og mga sugyot. Aw bisan kita nasayud na sa maong mga problema sama sa kanunay’ng paglunop ug pagbaha kun dunay mga uwan. Gusto nila nga dili kay mag-reactive lang ang mga opisyal nato sa kagamhanan. Angay sila nga mag-pro-active aron pag-alkontra sa problema.

Gusto usab sila og makanunayong pangalagad sa atong public hospitals ug nga unta dili kini mahutdan og mga tambal. Palamboon ang koleksyon sa basura. Kun imo sila’ng paminawon, mahimo na gud sila nga himoong mayor.

Ang problema lagi mao ang kwarta. Daghang mga proyekto nga angay’ng ipatuman nga moabut ra sa atong huna-huna apan ang problema kun asa kita og kwarta nga magamit sa pagpatukod.

Nagkahinabi kami kagahapon ni Ofelia Oliva, ang financial adviser karon ni Mayor Michael Rama, ug iyang gibutyag nga kun tinud-on lang gayud ang pagkolekta sa atong mga buhis pwerteng daghana og kwarta ang dakbayan.

Dili ko molalis niini kay nakita man nako nga pwerteng daghana na nga building nga mituyhakaw dinhi sa dakbayan. Ang kahulogan niini mao nga mosaka ang real property ug business taxes nga makolekta sa kagamhanan.

Nagkauyon ang baruganan namo ni Oliva nga ang problema anaa sa mga tax collectors ug sa mga tig-appraise sa buhis nga basin og makigkomboya sila sa mga taxpayers sa pagbinuang pinaagi sa pagpagamay sa kantidad nga bayranan sa mga magbubuhis… bugti niini puno usab ang ilang bulsa.

* * *

Gisalikway na gayud sa hingpit sa Bids and Awards Committee (BAC) ang Ai Kalami Foods nga makasuplay og walo ka milyon ka pesos nga kantidad sa pagkaon alang sa feeding program sa mga bata nga nagtungha sa Day Care Centers.

Gibarugan sa BAC ang ilang hukom nga wala makatuman sa legal requirements ang Ai Kalami Foods aron sila makasuplay og pagkaon sa kantidad nga P8 milyones. Mihimo man gud unta og hangyo ang Ai Kalami Foods nga hatagan unta sila og higayon nga makaprobar nga maayo sila mosuplay og pagkaon.

Karon, ang sunod nato nga tan-awon mao ang sunod nga bidder nga sunod sa Ai Kalami. Mas mahal kini og kantidad. Apan ang isyu lagi diha mao nga ang buot paliton sa dakbayan alang sa feeding program, extra large nga itlog.

Asa man sila og supply nga 300 mil kapin ka itlog? Nihit kaayo ang extra large nga itlog kay mao kini ang itlog sa mga guwang na nga manok. Ang extra large mao kadtong itlog nga ang timbang 64 gramos ug dili molapas sa 74. Ang guwang gud nga mga manok gagmay na lang kaayo og i-itlog apan dagko. Alkanse na kini sa mga tag-iya og poultry mao nga ibaligya na kining maong mga manok ug maoy rason nga nihit ang extra large nga itlog.