Ang plastik, ang basura ug ang baha

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Gitinguha karon sa pipila ka mga lokal nga kagamhanan ang hingpit na nga pagdili sa mga tindahan sa paggamit sa basura nga maoy himoong sudlanan sa ilang mga baligya nga paliton sa ilang mga kustomer.

Ang pagdili sa paggamit sa plastik maoy nagpasabot nga ang matag pumapalit nga mosulod sa mga tindahan maoy ilang himoon sa pagdala na lamang daan og ilang kaugalingon nga mga sudlanan.

Ang maong tinguha maoy paagi sa pagpakgang sa suliran sa pagbaha sanglit ang mga plastik nga nahimong basura nga gipataka lang sa paglabay sa matag human og gamit ilabay ug ipadpad sa hangin ug adto paingon sa mga kanal ug mga sapa.

Ang plastik nga nasulod sa kanal o mga sapa dili madunot ug labaw na nga dili malata ug makaali sa pagdagayday sa tubig nga mosangko sa pag-awas sa tubig o mga pagbaha.

Daghan ang nag-ingon nga kun mahingpit na ang pagdili ang paggamit sa plastik maoy gipaabot nga daghan usab ang kawad-an og panginabuhian.

Matud pa nila nga ang pagdili na og gamit sa plastik maoy nagpasabot nga ang produkto gikan sa mga pabrika sa pagpanggama og plastik dili na mahalin. Kun dili na mahalin ang ilang produkto nga plastik moepekto kini sa ilang mga kawani nga mawad-an og trabaho kay manirado na man ang mga pabrika sa plastik.

Nahimo kining suliran sa kagamhanan kay makadugang man kini sa gidaghanon sa katawhang Pilipino nga mga walay trabaho ug kun daghan ang walay trabaho maoy gikabalak-an nga mosangko kini sa suliran sa kahapsay ug kalinaw kay mapaabot man nga mosaka usab ang krimen. Nunot niining maong kabalaka maoy gisugyot sa mga trabahante sa pabrika sa plastik nga ang higpit nga pagdili sa paggamit sa plastik dili gayod maoy tukmang sulbad sa suliran sa baha.

Gipasabot nila nga ang tukmang sulbad sa suliran sa baha mao ang pagpalambo sa kahimtang sa mga kanal ug ang dili pagpataka og labay sa mga basura maoy tukmang sulbad sa maong suliran nga dili makahatag og epekto sa panginabuhi sa uban nga katawhan.