Pagbudhi sa katawhan

Nasinati na sab sa dakbayan sa Sugbo ang lapad nga paglunop sa atong kadalanan sa miaging Martes atol sa bunok sa uwan. Ug sama sa nanlabay nga mga higayon pulos binasulay ug pagpanulisok maoy atong nadunggan gikan sa atong mga opisyal.

Si Mayor Michael Rama nangayo og pasaylo sa publiko nga nabiktima sa baha. Matud niya dili tinuod nga dili prioridad sa iyang administrasyon ang pagsulbad niini.

Nagkanayon si Rama nga prioridad niya ang problema sa drainage nga maoy gitumbok nga dakong hinungdan sa lunop sa dakbayan matag higayon nga dunay uwan, apan iyang giangkon nga inutil ang iyang pamunoan pagsulbad niini tungod sa kakuwang og pundo nga magamit.

Gibasol ni Rama ang mga sakop sa konseho tungod sa paglaslas sa giproponer niya nga kapin sa P10 bilyones alang niining tuiga. Mamahimong tinuod nakatampo ni sa kalangan sa pagsulbad sa problema tungod sa limitado nga gahin, apan dili sab mahimong tapigan ni Rama ang kamatuoran nga dili ni maoy iyang prioridad.

Kun tinuod nga prioridad niya ang pagsulbad sa maong problema makita unta nato ni sa iyang mga lihok. Apan unsa may iyang gihimo? Mas busy si Rama sa pamolitika kay sa pagtagad sa problema sa dakbayan.

Mas giuna niya ang pagpanuborno sa mga kapitan ug mga konsehal sa barangay nga iyang kaalyado kaysa gastoon ang buhis sa katawhan sa mas mapuslanon nga mga butang.

Usa sa mga tataw nga ebidensiya nga mas importante ni Rama ang pamolitika kaysa pagsulbad sa problema sa drainage mao ang iyang pagpanghatag og mga luho nga mga sakyanan ngadto sa mga kapitan ug konsehal nga iyang kaalyado.

Kun gipamalit pa ni Rama og garbage truck ang iyang gigasto pagpamalit og mga brand new nga mga sakyanan nga tataw nga iyang gipanuborno mas makatabang ni pagsulbad sa problema sa baha.

Kini tungod kay usa sa mga nakatampo sa pagkabara sa atong drainage mao ang mga basura nga dili mamaayo pagkolekta ug mapasagdan nga magpasad sa karsada. Pero unsay iyang gihimo, mas giuna ni Rama ang pagpamalit og mga Toyota Hilux, Innova ug uban pa nga mga mahalon nga sakyanan.

Kinsa ra may makapahimulos niini, ang katawhan ba gud? Dili ba ang iya rang mga alyado sa politika? Mosugot kaha si kapitan nga hakutan sa basura ang brand new niyang Hilux sa higayon nga maguba ang ilang trak sa basura tungod sa kakaraan na niini?

Mosugot kaha si kapitan nga kargahan og masakiton paingon sa tambalanan ang maong sakyanan? Labing siguro himuong personal sa mga kapitan ug sa uban pa nga nakabenipisyo sa ilang pagpakigsuod sa mayor ang maong mga sakyanan.

Busa alang nako usa ni ka tataw nga pag-usik-usik sa kwarta sa mga magbubuhis ug pagbudhi sa katawhan ang gihimo ni Rama nga paggamit sa pundo sa gobyerno sa pamolitika.

Wala uroy mo mauwaw nga magsakay-sakay sa mahalon nga mga sakyanan samtang ang katawhan nga nagsweldo ninyo nag-antos pagbaktas sa libaongon nga mga karsada.

* * *

[email protected]