Usa ka kauban nato sa buhat ang napugos sa pagbalik sa ilang bay human napiksan sa hugaw nga tubig sa naghaguros nga sakyanan samtang nag-atang siya og jeep. “Nakapamalikas ko sa kalagot,” matud pa sa biktima. Apan wa kuno siya’y mahimo.
* * *
Duha kuno ang iyang gipakasad-an sa nahitabo. Dili lang ang abusado ug wala’y hustong panghunahuna nga driver ug ang gobyerno nga mipasagad lang sa mga libaong sa karsada diin gikan ang tubig nga misablig kaniya.
* * *
Ning panahona sa ting-ulan angay maghinay-hinay ang mga driver sa sakyanan kun naay mga tawong nanagbarog daplin sa kadanan, labi na kun kining mga tawhana nagpadung sa trabaho o ba kaha mga estudyante nga padung sa eskuwelahan.
* * *
Ug ang gobyerno sab unta asikasohon ang pagpanapak sa mga libaong diin mipundo ang tubig ulan nga maoy mosablig sa mga tawo kun maigo sa ligid sa sakyanan.
* * *
Kini bayang pagsablig og tubig ngadto sa mga inosenteng tawo sa daplin sa kadanan makasugod og kagubot tali sa mga driver ug mga inosenteng tawo. Nahinumdom ko atong nahitabo diha sa South Expressway pipila na ka tuig nga milabay. Usa ka lalaki nga nanghilam-os sa tubig nga nasablig kaniya sa usa ka taxi grabeng sukoa. Giatangan ang pagbalik sa taxi ug sa way daghang sulti gipusil ang driver patay.
* * *
TRIVIA. Mangumusta kita sa atong mga higala diha sa Carbon market area ug sa may Freedom Park. Daghang salamat sa inyong nagpadayong suporta sa Banat News.