EDITORYAL

Masumpo pa kaha ang vote buying?

Mga pangutana kini nga lisud kaayong tubagon alang sa mga politiko nga naanad sa pagpamalit og boto.

Ang politikong himalit og boto maoy nagtudlo sa mga botante sa pagbaligya sa ilang boto sa panahon sa election.

Sa maong pamaagi nawad-an og gahum ug kapuslanan ang kasagrado ug katungod sa pagbotar sa usa ka lungsoranong Filipino kansang boto mahinungdanon kaayo sa mga kandidato nga maayo og tuyo sa iyang pagkandidato.

Kay ang boto gud sa tawo sama man sa respeto nga di nimo mapalit, kay kini imong mahuptan gikan sa mga tawo nga imong girespetohan.

Kay kun una ka mokandidato nakapakita ka og mga maayong sumbanan sa inyong lugar pinaagi sa  imong kamaayong tawo, kamatinabangon sa panginahanglan sa imong kaigsoonan, kahigalaan ug mga silingan nga di lang kay sa pinansyal nilang panginahanglan kundi sa kaayohang moral ug espirituwal, aw di sila malimot kanimo sa adlaw sa election, bisan wa kay kuwarta.

Ang usa ka manager nga isog ug estrikto kaayo kay lagi perfectionist, motahod ug mosunod man kaniya ang iyang sakop apan pinugos ug bug-at sa buot.

Mao kanay matang sa lider nga way kapuslanan, tungod kay kun misunod kanimo ang imong mga sakop kay naglikay nga imong yawyawan ug kasab-an, wala ka magtudlo kanila og tinarong nga pagsunod kundi usa ka binarumbado nga paagi sa pagkalider.

Kay mituman sila kanimo nga way gugma ug ang anaa sulod sa ilang hunahuna mao ang pangandoy nga unta mawagtang ka sa ilang taliwala ug mailisdan og tarong nga lider.

Lahi sa tawo nga imong gipasunod uban ang imong gugma sa pagpanguna kanila kay motuman sila kanimo nga puno usab sa gugma ug kalipay.

Kun mawala ka panganduyon ka nila nga unta mahibalik ka kanila kay nag-umol ka sa ilang pagkatawo ug nagdasig ka kanila aron sila mabuhi nga may pulos ning kinabuhia.

Kun ikaw politiko nga botohan lang sa tawo   tungod sa imong kuwarta, angay nimong hinuktokan nga kun mahitabo nga wa ka nay kuwarta may molingi ba kaha kanimo.