Gugma ug Kalooy

Bulahan kaayo kadtong manag-uyab o managtiayon o ni bisa’g kinsa nga adunay gibatonan nga hiyas sa gugma ug kalooy, kay makaseguro ta nga may nindot nga padulngan. Apan hain man niini ang mawala, kadudahan nga molungtad ang panag-uban. Unsa man gyud ang birtud nga anaa nianing kaluhang pagbati?

Ang gugma matud pa, way pulong nga makahingpit sa paghulagway kun unsa gyud kini. Mga pangutana nga dili matukib ang pakisayod. Sakit kining way sintomas nga kalit mabati sa kasingkasing. Dili moila kun si kinsa ug unsa man. Madasigon nga puno sa pamasin ug determinasyon, bahala’g unsay sangputan.

Ang kaluoy usab, sama sa gugma di mo masabot. Moalagad nga way kapin kabubut-on nga mohupay sa kasakit. Mao lay mahimo ang pakig-unong, apan may kinutuban. Way pagpinig, andam tagana sa paghatag bisan pa kini ikadaut. Maantigong mosabot ug mainantuson nga may panlantaw maghatag og paglaom.

Apan kun kining gugma ug kalooy mag-uban nga anaa kanato, kini maoy mobalanse nga lig-onon ang kahuyang. Mosanong sa tanan kun unsay angay itakdo nga molahutay. Mosakripisyo sa kalipay ug kalisud. Puno sa pagmahal ug pagsinabtanay. Dili igsapayan ang unsa mang moabot nga kakulian sa kinabuhi.

Kun kini mabatonan sa tanan, tingali way maghilak sa pagbasol tungod sa epekto sa kahakog. Masaaron sud-ongon ang palibot, nga nindot damhon ang kaanindot sa kinabuhi, nga puy-an ang kalibutan nga tugob sa pagmahal. Way pagpaka-aron-ingnon, nga permi moabag sa pagpanlimbasog sa mga damgo.