Ang kuyaw sa pagbaha ug pagdahili sa yuta

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Ang Septiyembre hangtod sa Disyembre maoy bulan sa kanunay nga pagbunok sa ulan nga dala sa dautang panahon nga maoy hinungdan sa panginahanglan sa pagpangandam sa kagamhanan ug magmabinantayon usab ang mga molupyo nga hingtungdan.

Ang Mine and Geophysical Bureau (MGB) sa Department of Environment and Natural Resources (DENR) dinhi sa rehiyon 7 naghimo na karon og mga pagsuhid sa mga dapit nga adunay hulga sa maong matang sa katalagman.

Matud pa nila nga dinhi sa Sugbo maoy kuyaw sa pagdahili sa yuta ang mga barangay nga nahimutang sa bukiran nga bahin nga maoy hinungdan nga nagkinahanglan kini og mga pagbantay sa kagamhanan ug mga molupyo sa hingtungdan.

Dugang pa nila nga kun masinati ang kusog kaayo nga ulan maoy labing pagahimoon sa mga molupyo ang paghiklin gilayon ngadto sa luwas nga lugar tungod kay pinaagi lamang niini kalikayan nga adunay makalas nga kinabuhi.

Giangkon sa mga opisyal sa kagamhanan nga mahimo nilang suliran ang mga molupyo sa kuyaw nga lugar sa matag higayon nga awhagon na sa paghiklin.

Gitataw nila nga sagad sa maong mga molupyo dili gayod mosanong kay mawili kini sa ilang mga butang nga ang ilang mga panimalay nga ilang biyaan sa ilang paghiklin maoy mosunod ang mga kawatan nga mopahimulos sa maong kahigayonan.

Adunay mga nag-ingon nga ang pipila ka molupyo sa mga dapit nga maigo sa pagbaha sa tubig maoy ilang gihimo ang pagbutang usab og ilang kaugalingong sukod sa pagtubo sa tubig nga maoy ilang paghiklin sa pagsiguro nga sa ilang pagbiya dili usab makasunod ang mga kawatan kay ibanlas na man sa pagbul-og sa baha.