Panamin usa bai!

Mipalyar ang akong lawas sa milabay’ng duha ka adlaw. Wala ko madunggi sa DYLA ug wala ko’y mga balita nga napatik sa The Freeman kay wala ko mo-duty adtong Huwebes ug kagahapon.

Kapoy kaayo ang akong lawas mao nga sigi lang ko og pamasahe sa kinaham nako nga masahesta, usa ka buta. Atul gud nga gihilantan ko, napagaw pa gayud ang akong tingog mao nga wala na lang ko mopugos sa pag-report sa radyo.

Mao kini nga miabut sa akong kaisipan kun unsa kabililhon nga atimanon pag-ayo ang atong tambalanan. Swerte lang nga kami sa The Freeman-Philippine Star duna may private health care nga gihatag nga libre sa kompaniya.

Kun manginahanglan kaming sakop sa media og abag, anaa usab ang Cebu Media Assistance Fund (CEMAF) nga abagahon ang P25,000 namo nga gasto. Apan nahuna-huna nako kadtong uban nga wala intawo’y private medical insurance.

Kini maoy rason mga higala nga kay nagsingabot na man ang eleksyon, mitumaw na kining mga tawo nga gusto nga magpapili sa atong kagamhanan, sutaa kun sila angay ba nato nga botohan.

Gusto gayud unta nako nga hatagan og dakung pag-atiman ang Cebu City Medical Center ug ang Vicente Sotto Memorial Medical Center kay mao kini ang madali-dali nga madangpan sa mga kabus nato nga kaigsoonan.

Siyaro og dili kamo makabantay kun kinsa ang mga tawo nga nagpakabana sa kahimtang nato sa panglawas. Tambag nako nga atul sa mga “pulong-pulong” sa lainlaing barangay pangutan-a ninyo ang mga gustong mokandidato.

Pait kaayo ang kahimtang niadtong mga tawo nga modangop sa atong tambalanan apan inig-abut didto dili diay madapatan og tambal ang ilang pasyente kay ang ospital walay pundo nga tambal. Dili ba tinuod?

* * *

Nakadungog ko nga dunay magsisibya sa usa ka radio station nga mihisgot kuno kanako sa iyang tulomanon sa radyo.

Ang iyang kauban maoy mitug-an niini kanako. Ang rason nga gihisgotan ko sa maong magsisibya, mao ang kabahin sa akong pagka deputized agent sa Land Transportation Office (LTO).

Igo lang ko nga mipahiyom nga naminaw. Ang mitug-an nako akong giingnan nga pasagdi lang na siya kay wala man siya masayud sa iyang gibuhat.

Wala gayud nako ikauwaw nga nahimo ko nga LTO deputized agent kay mohapit na lang ko upat ka tuig nga nanakup, apan wala ko mangilkil sa madakpang drayber bisan og usa ka sentimo kay gusto nako nga mahimong sumbanan unta sa ubang road law enforcers.

Daghan na nga mga drayber nga misuway og tunol nako og kwarta. Dili ko mosingka ug ako sila nga pasabton nga kay kwartahan man diay sila kay manghatag man sila og kwarta, kinahanglang bayaran nila ang tanan nila nga kalapasan.

Kining magsisibya nga misaway o kaha mikwestyon sa akong pagka “agent” sa LTO, panamin usa bay!