Litaniya sa kalapasan

Ang kalapasan nga gibisto sa Commission on Audit (COA) sa paggamit sa mga sakyanan sa gobyerno di monopoliya sa Dakbayan sa Sugbo. Ubang local government units (LGUs) ug nasudnong mga buhatan sa gobyerno nakalapas sab sa mga lagda nga nagdili sa paggamit sa mga sakyanan sa gobyerno alang sa personal nga katuyoan. Gawas sa kapakyas pagrehistro sa mga sakyanan sa Land Transportation Office (LTO), mas taas ang litaniya sa kalapasan nga nahimo ang LGUs ug nasudnong mga buhatan sa paggamit sa mga sakyanan sa gobyerno. Palihug basaha ang listahan sa kalapasan sa ubos ug hilaki ang way kukauwaw nga pag-usik-usik sa buhis ug pagbudhi sa interes sa katawhan:

* * *

1. Pagparada sa mga sakyanan sa kabalayan sa mga opisyal ug mga kawani sa gobyerno busa sayon rang gamiton alang sa personal nga mga biyahe sa lawom nang mga takna sa gabii, o sa weekends, o sa holidays;

2. Paggamit sa mga sakyanan sa gobyerno alang sa mga biyahe nga way trip ticket ug gipakabay-an sa mga pasahero nga wa tugoting makasakay;

3. Pagsuyop sa gasolina o krudo gikan sa mga sakyanan sa gobyerno nga dunay trip ticket ug gibalhin pagtubil ngadto sa ubang mga sakyanan sa gobyerno nga way trip ticket o sa pribado gyud nga mga sakyanan sa mga opisyal ug mga kawani sa gobyerno;

4. Pagtuyo pagguba sa odometers sa mga sakyanan sa gobyerno aron pagtabon sa tinuod nga gilay-on sa mga biyahe nga kasagaran naglakip sa pribadong mga lakaw;

* * *

5. Pagtangtang sa red plates, nga ilegal nga gipulihan og green plates, aron di mailhan sa publiko ang mga sakyanan sa gobyerno ug aron gawasnon nang maggamit sa bisan unsang katuyoan;

6. Pagdumili pagbutang sa markang “For Official Use Only” ug sa ngan ug logo sa nanag-iyang buhatan sa gobyerno sa mga pultahan sa atubangan aron nga di kaayo mosiwil ang personal nga mga biyahe, apil na ang mga padung sa mga bay kahilayan; ug

7. Pagpadayon pagkobra og representation ug transportation allowances (RATA) bisan kun gidestinohan na og sakyanan sa gobyerno.

* * *

Ang kalapad sa pangabuso sa mga sakyanan sa gobyerno nanukad sa pagtuo sa mga opisyal ug mga kawani sa gobyerno nga way magpakabana pagbadlong sa ilang kalapasan. Mao sab ni hinungdan sa padayong pagtidlom sa pagtan-aw sa mga magbubuhis sa kaligdong sa nagkalainlaing mga buhatan sa gobyerno pagpatuman sa mga lagda. Maong angay nga palambuon ug hingusgan pa ang “Oplan Red Plate” sa COA, Visayas Ombudsman, Civil Service Commission, LTO, Land Transportation Franchising and Regulatory Board, Philippine Information Agency ug Philippine National Police. Nga hinaot makakumbinser sa publiko pagtabang sa kampanya kay sila ang mas takos sa pagbantay, pagdokumento ug pagbaraw sa tanang kalapasan sa tanang oras sa tanang adlaw.

* * *

Email: [email protected]