Daghan ang midayeg kaysa misaway sa pagtudlo ni Pres. Aquino kang Associate Justice Maria Lourdes Sereno nga chief justice (CJ) puli kang Renato Corona nga gitangtang sa iyang katungdanan pinaagi sa impeachment. Siya ang unang babaye nga nahimong CJ ug ikaduhang labing batan-on. Nag-edad pa lamang siya og 52 anyos apan ang labing batan-on mao si Cayetano Arellano nga nag-edad og 51 sa dihang nahimong CJ.
Kami ni Johnrey Saavedra sa The Freeman Newspaper ug Atty. (Gen.) Fritz Quiñanola sa Clearcut Tonight tv program nagtoo nga si Sereno maoy usa sa tulo nga maoy pilian ni Pres. Aquino nga itudlo pagka-chief justice. Ang laing duha mao sila si Associate Justice Antonio Carpio ug Solicitor General Jardeleza.
Bisan gani ang hinawayon kaayong si Sen. Miriam Defensor Santiago midayeg sa pagkatudlo kang Sereno. Sumala niya nga dili magpadiktar ang bag-ong chief justice kang Pres. Aquino tungod kay nakaila kaayo siya sa kaligdong, kaisog ug kalantip og salabutan ni Sereno.
Bisan si Sen. Pia Cayetano midayeg usab kang Sereno. Sumala niya nga kun mangita kita og "best man for the job, pick a woman." Ang impluwensiyadong Makati Business Club mihangop usab sa pagtudlo kang Sereno nga maoy mangulo sa korte suprema. Misaway hinoon kaniya ang mga walhong grupo labi na ang mga mag-uuma sa Hacienda Luisita. Nahadlok sila nga tungod kang Sereno mosamut og kalangay ang paghatag ngadto kanila ang ilang luna sa maong hacienda nga gipanag-iya sa mga Cojuangco ug Aquino, apil na ang presidente.
Gipaabut nga sulod sa 18 ka tuig nga pagdumala unya niya sa Korte Suprema, usa siya moretiro sa edad nga 70 anyos, makahimo siya og mga maayong kausaban nga makapabalik sa pagsalig sa katawhan sa labaw’ng hukmanan.
Inay nga ato dayong husgahan ug sawayon, atong hatagan og igong higayon ug paluyuhan ang bag-ong CJ aron madasig siya sa paghimo og mga buhat nga makahatag og kaayuhan sa kinabag-ang Pilipino.
* * *
Ang gitagna na usab karon mao ang itudlo ni P.Noy pagka-kalihim sa Department of Interior and Local Government (DILG) puli sa mitaliwan nga si Sec. Jesse Robredo.
Ako nagtoo gihapon nga bisan sa mga pagsaway sa ubang mga tawo si Sen. Ping Lacson gayud ang itudlo sa presidente sa maong posisyon. Kining maong pangagpas diha na bisan sa buhi pa si Robredo.
Daghan hinoon ang nahadlok ug nag-ampo nga dili unta si Lacson maoy mangulo sa DILG. Nagkurog na karon ang mga kwanggol, kawatan, kurakot ug dagko'g tiyan nga mga tinugyanan sa balaud kay nasayud sila nga dili sila pasayloon ni Lacson.
Ang pangutana kun biyaan ba ni Lacson ang pagka-senador nga unya pa matapus human sa piniliay sa 2013 ug dawaton niya ang pagka-kalihim sa DILG?
* * *
Napiang ug naluya ang Bando Osmeña - Pundok Kauswagan (BOPK) sa pagtaliwan ni DILG Sec. Robredo. Kita sayud kun unsa kasuod ni Kong. Osmeña si Robredo nga nagsugod niadtong mayor pa silang duha. Mao man gani tingali katarungan nganong dili gyud imbitaron si Mayor Mike Rama sa mga okasyon nga makigkita si Robredo ug ang presidente sa Liberal Party (LP) ni Mar Roxas sa ilang mga sakop dinhi sa Sugbo.
Karon, miminus na ang kahigayonan sa BOPK nga maoy paluyuhan sa LP dinhi sa siyudad. Lahi man gud ang baruganan ni P.Noy kaysa kang Roxas kalabut sa politika. Sumala pa mas suod ni Rama si P.Noy kun itandi sa relasyon ni Osmeña sa presidente. Dinhi nato makita ang katag.
* * *
Mitaliwan na ang usa ka suod namong higala, Bert Reformina. Milunga siya niadtong Miyerkules sa buntag sa sakit nga cancer sa baga nga dugay niyang gihambin.
Usa si anhing Bert nga naghatag kinabuhi sa among grupo, Golden Boys, sa White Gold coffee shop. Maayo siyang moluto og nagkalainlaing pagkaon nga iyang dad-on ug pasaw-an kanamo samtang magkomedyahay. He's a jolly good fellow. We will miss your jokes, Bert. Padayon sa imong panaw kay magkapundok ra gihapon kita didto sa imong padulngan. Rest in peace!
* * *
Email: msr1144@yahoo.com