Unsay imong Tubag?

Mas pang lisud ang pagpanamilit sa usa ka butang itandi sa mga sakripisyo nga gihimo aron lang mahimong magmalampuson ang matag produkto nga mogawas. Kini ang akong gibati sa dihang hingpit nang nanamilit ang programang Halad sa Kapamilya sa telebisyon niadtong Sabado. Su’d sa tulo ka tuig, nahimo nakong responsibilidad ang maong tulumanon nga maoy nahimong tulay sa mga tawo nga nanginahanglan og tabang sa mga tawo ug institusyon nga adunay katakos sa pagtabang.

Matag Sabado nahimong dakong hagit unsaon nga mapalapdan pa sa katawhan ang ilang mga nahibaw-an sa pag-amping sa ilang panlawas ug paghatag og solusyon sa ilang mga gipangmulo nga sakit.

Ang Halad sa Kapamilya mao ‘sab ang nagbukas og daghang kahigayonan sa panarbaho, paghatag og dugo sa mga tawo nga nanginahanglan, pagkat-on sa mga bag-o apan epektibong paagi sa panarbaho, mga outreach program sa mga kompaniya, mga one stop shop sa gobyerno ug uban pang pribadong institusyon. Kining tanan nga lakang, ang naglangkob sa Halad sa Kapamilya su’d sa tulo ka tuig sa kahanginan.

Ang maong mga proyekto ‘sab ang hinungdan nganong nakadawat og mga pasidungog ang programa gikan sa mga iladong award giving body sa Sugbo ug sa tibuok nasud. Apan sa pagtak-op sa programa sa telebisyon, magpabilin nga aktibo ang mga kalihukan sa Halad sa Kapamilya nga maoy nahimong taytayan sa tabang alang sa mga nangayo og tabang.

Sa pagpanira sa programa matag Sabado sa telebisyon, mao ‘sab ang pagbukas sa bag-ong programa sa susamang adlaw sa alas siyete sa buntag. Ang TUBAG, usa ka tulomanon nga maningil og aksyon ug tubag gikan sa mga ahensya sa gobyerno ug hingtungdang tawo o ahensya sa mga problema ug reklamo nga gipadangat sa publiko.

Kung sa kanunay, pulos reklamo ang atong madunggan, karon mangahas ang TUBAG sa pagkuha sa tubag ug aksyon gikan sa gobyerno. Ning panahon sa lapad nga pagpakabana uban sa katakos sa pagpadayag sa ilang reklamo gamit ang bag-ong teknolohiya, kinahanglan nga mas abtik ug mas sinsiro na ang gobyerno sa pag-aksyon ug pagtubag sa daghang mga reklamo sa katawhan.

Karong Sabado sa alas siyete sa buntag, TUBAGon sa mga hingtungdan nga ahensya sa gobyerno ang dugay apan wa’ pay solusyon nga reklamo batok sa mga red plate vehicles o mga sakyanan sa gobyerno nga gigamit sa pribadong lakaw nilang mayor, kapitan, konsehal o bisan kinsa nga kawani sa gobyerno. Dakong insulto alang sa mga magbubuwis ang pag-abuso sa mga sakyanan sa gobyerno nga gigamit sa mga pribadong lakaw sama sa paghatud sa mga anak sa tunghaan, pagtambong og mga pribadong party, pagbisita sa mga bar, grocery ug bisan pagsimba. Ang katawhan nga maoy nagkapuliki sa ilang trabaho aron makatubag sa ilang mga panginahanglan apan kinahanglan pang laslasan ang sweldo og buwis maoy labing nagkabaguod sa mga gihimo sa mga badlungon nga opisyal ug empleyado sa gobyerno. Apan di’ sa tanang higayon nga mobasol ‘ta sa mga ahensya sa gobyerno ug mamasangil nga wa’ ‘ta makaangkon og tubag sa mga reklamo. Adunay mga higayon nga sa kapait sa sitwasyon ug ka dako sa hagit sa pagtubag sa mga reklamo, apan huyang ang mga paagi o lakang sa pagpatubag niining tanan.

Adunay mga higayon ‘sab nga sa kadaghan sa mga maayong programa sa gobyerno, apan kuwang ‘ta sa pagtuki sa ilang mga tubag sa mga problema nga ila nang gi-aksyonan. Kini ang hinungdan nga kinahanglan nga saludohan ang ilang mga maayong nahimo aron aduna silay interes nga mopadayon pa sa ilang ligdong nga pangalagad. Sugod karong Sabado, alas siyete sa buntag, atong ubanan si Leo Lastimosa nga mo-arangkada pagsiksik sa mga detalye, pag-imbestigar sa isyu ug pagpangita og aksyon o TUBAG.

Email: [email protected] or [email protected]