Petsa 22 ning bulana niadto ko sa Bogo. Nihapit ko sa internetan buyon sa maoy Novo kay duna ko’y gisusi sa akong FB. Apan sa kalit lang dunay kagahob sa gawas kay lagi dunay mamaligyaay og butong kansang ulo gibuslotan sa bala gikan sa armas de fuego. Pastilan! Ang kinabuhi sa tawo karon mura na man lang og manok kutloon na man lang bisan sa udtong tutok atubangan sa mga saksi nga walay pagpamilok. Mao tingali ang mga unggoy dakong supak nga ang tawo gikan nila kay walay mga unggoy nga mopatay sa ilang isigka-unggoy ni dunay unggoy nga mipakuha ug mi-abort sa ilang kaugalingong mga anak. Bugtong tawo ra gyud ang nihimo sa ingon.
Ang maong insidente ang mopahinumdom kanatong mga tawo ning mosunod:
A. Una, bililhon ang kinabuhi busa angay lamang natong atimanon pinaagi sa paglikay sa mga kahigayonan nga magdala kanato sa hinanaling kamatayon. (pagkaon, lihok ug pagbati).
B. Ikaduha, katungdanan ni bisan kinsa nga iyang panalipdan ang iyang kinabuhi gikan sa bisan unsang hulga ug katungod ni bisan kinsa nga magpakabuhi segun sa paagi nga siya magmalipayon.
C. Ikatulo ug katapusan, palamboon nato ang kultura sa kinabuhi ug dili ang kultura sa kamatayon. Sagrado kaayo kini busa dili maayong isalibay lamang sa daplin.