Pogi, Bok, Bright Boy

Di makita ang kaligdong ni DILG Secretary Jesse Robredo. Di mahikap ang iyang kaligdong. Di masukod ang iyang kabuotan. Di matimbang ang iyang katakos. Ang makita mao ra ang mga epekto sa iyang maayong mga buhat. Nga, ning panahon nga kanunay’ng nag-apura sa konkreto nga mga resulta, mahimo nga di dayon motumaw sa di pa mapupos ang interes sa katawhan.

Kanus-a pa man masunod sa ubang local government units (LGUs) ang maayong mga panig-ingnan sa 18 ka tuig nga pagduma ni Robredo sa Naga City? Kanus-a pa man mabatyagi sa kinabag-an sa katawhan ang sangpotanan sa “Seal of Good Governance” nga nahatag ngadto sa nakapasar nga LGUs ug nasudnong mga buhatan sa gobyerno?

* * *

Ang dako uyamot natong kahigwaos sa maayong pangagamhanan maoy hinungdan sa lapad nga pagbangotan sa kamatayon ni Robredo sa niaging semana ug sa kamatayon ni kanhi presidente Cory Aquino niadtong 2009. Sama nga nalumsan sa kaguol ang atong katiguwangan sa kamatayon ni kanhi senador Ninoy Aquino Jr. niadtong 1983.

Samang kahigwaos maoy nagtukmod nato pagkumpayot sa mga simbolo: Dagway ug panultihon ni Ninoy; dagway, mga tudlo, dalag nga kandila ug mga pangaliya ni Cory; ug ang tsinelas, kamisin ug bayhon sa himsog kaayo ug nagtiniil nga si Robredo.

* * *

Napaso ta human sa Edsa Uno sa 1986. Dihang gikawat ang mga kinawat ni kanhi presidente Ferdinand Marcos ug sa iyang cronies. Napaso ta human sa Edsa Dos sa 2001. Dihang ang pamunoan ni Gloria Arroyo nilabaw pa sa mga eskandalo sa gipulihan nga pamunoan ni Joseph Estrada.

Hapit na ta pul-i og pinaabot sa katumanan sa gisaad nga pagbadlong sa kahiwian sa mga nagtungkawo sa gahom ug pagtapos sa kakabos sa kinabag-an sa katawhan sa duha pa ka tuig nga pamunoan ni Noynoy Aquino. Maong di ta gusto nga mausik, malimtan, matunaw ug hingpit nga mahanaw ang maayong mga mithi nga gibilin ni Robredo.

* * *

Dugang mga simbolo sa katalagsaon ni Robredo gipalili nato sa ikaduha niyang anak, si Patricia “Tricia” Robredo, 18, sa iyang mensahe isip tubag sa ilang pamilya sa tanang pasidungog alang sa iyang amahan: Sec, Mayor, Pogi, Bok, Bright Boy ug Papa ang pipila sa ilang angga niya; nagtiniil ug nag-pajama si Robredo ug nagbitbit og dextrose pagkasal sa magtiayon sud sa ilang bay; ug naglikay siya pagsulti og masuk-anong mga pung sa ubang mga tawo pinaagi sa pagpaak sa iyang mga tudlo.

Wa mag-inusara si Robredo. Di siya maoy una, ug labing seguro nga di maoy kataposan, nga matinud-anong nialagad sa katawhan. Di tanan nila makaangkon og kahigayonan nga magpakamatay alang sa nasud ug sa katawhan. Hinaot nga ato na silang ilhon, pasidunggan ug sundon. Sa di pa uwahi ang tanan. 

* * *

Email: [email protected]