EDITORIAL - Ang bag-ong chief justice sa Korte Suprema

Walay tawo nga perpekto busa lisud kaayong tuohan nga ang bag-ong chief juctice karon sa Korte Suprema di mosipyat sa iyang personal nga kapasidad sa pagdumala sa hustisya sa nasud. Apan ang bugtong gilauman sa mga Filipino nga kumo kay si Chief Justice Ma. Lourdes Punzalan Aranal Sereno namontar man human sa gikagubtang pagkahabwa ni kanhi Chief Justice Renato Corona gikan sa maong katungdanan, ang pagkamabinantayon nga di siya maligas sa iyang mga desisyon, maoy gituohan sa tanan nga iyang buhaton. Ang mga Filipino bun-og kaayo sa mga binuang sa mga kadagkoan sa nasud nga unta bisan mayoridad ang mga kuwang sa edukasyon ug mahug nga inosente, apan daghan na kaayong mga Filipino nga utokan ug manggialamon nga usahay mas labaw pa og abilidad sa mga malditong lider nga nakaako pa sa paglingla sa ilang isig-kaingon. Usahay ang mga matawag nga kuwang sa edukasyon mas dali pang makabantay nga sila gibinuangan kay sa mga husto og kaalam.

Kay ang mga gagmay og nakab-ot nga edukasyon sa eskuylahan mabinantayon kaayo ug manggidudahon busa ang usa ka maayo ug buotan nga opisyal sa kagamhanan di angay nga maghunahuna pagbinuang sa iyang isig-kaingon kay sa matag lakang niya paglingla sa tawo sihag kaayo ang maong binuang. Sama sa gibuhat kaniadto ni kanhi Presidente Marcos ug uban pang dagkong lider sa Pilipinas lakip na ang mga natangtang sa katungdanan gumikan sa impeachment, di ba sihag kaayo ang ilang sipyat dihang giligid sila og imbistigar sa mga magbabalaod sa nasud?

Unya karong panahona naa pa diay makaako sa paghimo og binilyako sa pagdala sa ilang katungdanan nga dali man kaayo silang masakpan.

Ug sa higayong masakpan sila, dili lang sila mabaniog sulod sa ilang opisina kundi halos ang tibuok kalibotan ilabi na ang mga Filipino nga atua sa ubang kanasuran masayud sa ilang binuang kun imbistigahon na sila sa kongreso. Busa sa daghan na kaayong makapasubo nga kasinatian sa mga lider sa nasud kinsa nasakpan sa ilang binuang, aw maingon nato nga si Sereno mat-an na kaayo alang niini ug nasayud na siya nga matag lihok niya gibantayan sa minilyon ka mga Filipino.