Sa imong pagka-ikaw

Nangutana ang maestro sa iyang estudyante."Ngano man Paul nga dasig ka man kaayo didto sa basketball court apan diri sa classroom luya man ka. "Mitubag ang estudyante, "Kay tua man ang akong kasingkasing ug huna-huna ug ang nia diri mao ra ang akong lawas."

Kitang tanan hinulma sa Ginoo nga may tagsa-tagsa nga hiyas aron sa ingon molihok kita sigon sa gitahas niya nga atong buhaton. Kung unsa man ang iyang gihatag dili nato isalikway hinunoa ato kining palambuon. Dili maayo nga atong hulmahon ang kaugalingon sa pagsuon ug sa pag-indigay. Ang paghimo sa ingon makapakgang sa atong pagtubo.Kung makita nato nga mas maayo ang uban maluya kita ug mawad-an og gana sa atong pagahimuon. Ug kung makita nato nga mas maayo kita sa uban, mosubra ang atong pagsalig sa kaugalingon ug kini usahay makapahimo natong mapahitas-on ug makalimot kita nga tawo ra ta ug may limitasyon.

Kung asa kita magmalipayon adto kita. Mahimo lamang kini pinaagi sa pagsusi sa mga hiyas nga ania kanato kay mao kana ang ipaugmad sa Ginoo kanimo.